انگلینڈ کے خلاف 311 رنز کے خسارے کے باوجود ہندوستان نے ڈرا کرایا ٹیسٹ، جڈیجا اور واشنگٹن کی ناقابل شکست سنچریاں

مانچسٹر میں ہندوستان اور انگلینڈ کے درمیان کھیلا گیا چوتھا ٹیسٹ میچ ڈرا پر ختم ہوا لیکن یہ مقابلہ ہندوستان کے لیے کئی حوالوں سے یادگار ثابت ہوا۔ انگلینڈ نے پہلی اننگز میں 669 رنز کی بھاری بھرکم اننگز کھیلی اور ہندوستان کو 311 رنز کا خسارہ دیا۔ ہندوستانی ٹیم پہلی اننگز میں صرف 358 رنز ہی بنا پائی تھی۔

دوسری اننگز میں ہندوستان کا آغاز انتہائی خراب رہا۔ اوپنر یشسوی جیسوال اور سائی سدرشن بغیر کھاتہ کھولے آؤٹ ہو گئے۔ دونوں کو پہلے ہی اوور میں کرس ووکس نے پویلین بھیج دیا۔ اس نازک موقع پر کے ایل راہل اور کپتان شبھمن گل نے ٹیم کو سنبھالا اور 188 رنز کی اہم شراکت قائم کی۔ شبھمن گل نے شاندار سنچری بنائی، جبکہ راہل بدقسمتی سے سنچری مکمل نہ کر سکے۔

راہل اور گل کے آؤٹ ہونے کے بعد واشنگٹن سندر اور رویندر جڈیجا نے بیٹنگ محاذ سنبھالا۔ دونوں نے نہ صرف سنبھالا بلکہ انگلش بولرز کو تھکا دیا۔ دونوں بلے بازوں نے ناٹ آؤٹ سنچریاں بنائیں اور میچ کو یقینی شکست سے بچا لیا۔ جب پانچویں اور آخری دن کا کھیل ختم ہوا تو ہندوستان نے چار وکٹ پر 425 رنز بنا لیے تھے۔ جڈیجا 107 اور واشنگٹن سندر 101 رنز پر ناٹ آؤٹ رہے۔

انگلینڈ کی پہلی اننگز میں جو روٹ نے 150 رنز کی شاندار اننگز کھیلی، جبکہ کپتان بین اسٹوکس نے 141 رنز بنائے۔ دیگر نمایاں بلے بازوں میں زیک کراؤلی (84)، بین ڈکٹ (94) اور اولی پوپ بھی شامل تھے جنہوں نے نصف سنچریاں بنائیں۔ ہندوستان کی جانب سے جڈیجا نے سب سے زیادہ چار وکٹیں حاصل کیں، جبکہ واشنگٹن اور بمراہ نے دو، دو شکار کیے۔ انشل کمبوج اور محمد سراج نے ایک، ایک وکٹ حاصل کی۔

ہندوستان کی پہلی اننگز میں سب سے زیادہ 61 رنز سائی سدرشن نے بنائے تھے۔ جیسوال نے 58 اور رشبھ پنت نے 54 رنز بنائے۔ کے ایل راہل (46) اور شاردل ٹھاکر (41) نے بھی اچھی شراکتیں دیں۔ انگلینڈ کی جانب سے بین اسٹوکس نے شاندار بولنگ کرتے ہوئے پانچ وکٹیں لیں، جب کہ جوفرا آرچر نے تین کھلاڑیوں کو آؤٹ کیا۔

اگرچہ یہ میچ ڈرا رہا لیکن ہندوستان پانچ میچوں کی سیریز میں اب بھی 1-2 سے پیچھے ہے۔ آخری میچ میں جیت بھی سیریز کو صرف برابر کر سکتی ہے، جیت نہیں دلا سکتی۔ البتہ اس میچ نے ہندوستانی ٹیم کی مزاحمت اور جیت کے جذبے کو ایک بار پھر نمایاں کیا۔