ہندستان کو زخمی جنوبی افریقہ سے رہنا ہوگا ہوشیار

ہندستان کو آئی سی سی ورلڈ کپ کرکٹ میں اپنی آج مہم شروع کرتے وقت زخمی جنوبی افریقہ کے جوابی حملے سے ہوشیار رہنا ہہوگا ۔ہندستان کا ورلڈ کپ میں یہ پہلا میچ ہوگا جبکہ جنوبی افریقہ کی ٹیم اپنا تیسرا میچ کھیلنے اترے گی۔ ورلڈ کپ شروع ہوئے ایک ہفتہ ہو چکا ہے اور ہندستان واحد ایسی ٹیم ہے جس نے اپنی مہم شروع کرنی ہے۔ دیگر نو ٹیمیں کم از کم ایک ایک میچ کھیل چکی ہیں۔ جنوبی افریقہ کا یہ تیسرا میچ ہوگا جبکہ انگلینڈ اور پاکستان نے دو دو میچ کھیل لیے ہیں۔

دنیا کی دوسرے نمبر کی ٹیم ہندستان نے ورلڈ کپ سے پہلے اپنا آخری پریکٹس میچ 28 مئی کو کھیلا تھا اور اسے ایک ہفتے کے انتظار کے بعد اپنی مہم شروع کرنے کا بے تابی سے انتظار ہے لیکن اسے جنوبی افریقہ سے ہوشیار رہنا ہو گا جو مسلسل دو میچ ہارنے کے بعد زخمی شیر جیسی ہو چکی ہے۔ جنوبی افریقہ کو اگر ورلڈ کپ میں بنے رہنا ہے تو اسے یہ میچ ہر حال میں جیتنا ہوگا۔

دوسری طرف ہندستان کی حالت بھی ایک ایسے شیر کی ہے جو اپنے شکار پر جھپٹنے کا انتظار کر رہا ہے اور اس مقابلے میں وہ حوصلے میں ٹوٹ چکی جنوبی افریقہ کا شکار کرنا چاہے گا۔ ہندستان کو دنیا کی نمبر ایک ٹیم اور میزبان انگلینڈ کی پاکستان کے ہاتھوں گزشتہ میچ میں شکست کو دیکھتے ہوئے محتاط رہنا ہوگا۔ اپنے پہلے میچ میں ویسٹ انڈیز سے کراری شکست برداشت کرنے والی پاکستان کی ٹیم نے انگلینڈ کو پیر کو 14 رن کی جیت سے چونکا دیا تھا۔ پاکستان نے ویسٹ انڈیز کے خلاف 105 رنز پر آؤٹ ہونے کے بعد جس طرح انگلینڈ کے خلاف 348 رن کا اسکور بنا کر واپسی کی، اسی طرح جنوبی افریقہ کی ٹیم بھی واپسی کرنے کی کوشش کر سکتی ہے۔ہندوستان کو ورلڈ کپ میں اپنی مہم شروع کرنے کے انتظار کرنے کی جھجک سے بھی باہر نکلنا ہو گا۔

اس دوران ہندستانی ٹیم مینجمنٹ یہ طے کر چکا ہو گا کہ اس میچ میں اترنے والی اس آخری الیون کیا ہوگی۔ آخری فیصلہ پچ دیکھنے کے بعد ہوگا لیکن ہندستانی الیون میں آل راؤنڈر اور اسپن اٹیک کا انتخاب مینجمنٹ ٹیم کے لئے مشکل ہو جائے گا۔ ٹاپ آرڈر میں شکھر دھون، روہت شرما اور وراٹ کوہلی کے بعد لوکیش راہل اتریں گے۔ راہل نے بنگلہ دیش کے خلاف پریکٹس میچ میں شاندار سنچری بنا کر چوتھے نمبر کا مسئلہ حل کر دیا ہے۔ پانچویں نمبر پر مہندر سنگھ دھونی اتریں گے جنہوں نے بھی بنگلہ دیش کے خلاف پریکٹس میچ میں سنچری بنائی تھی۔ چھٹے نمبر پر آل راؤنڈر ہردک پانڈیا رہیں گے۔ ہندستان کا مسئلہ چھٹے نمبر کے بعد شروع ہوتا ہے۔ کیا وہ اس کے بعد پارٹ ٹائم آف اسپن کرنے والے آل راؤنڈر کیدار جادھو کو اتارے یا پھر لیفٹ آرم اسپن کرنے والے رویندر جڈیجہ کے تجربے کو ترجیح دے جنہوں نے نیوزی لینڈ کے خلاف ہندستان کی شکست میں ساکھ بچانے والی نصف سنچری بنائی تھی۔ اس کے ساتھ ہی ہندستانی ٹیم مینجمنٹ کو یہ بھی دیکھنا ہے کہ وہ اپنی اسپن جوڑی لیگ اسپنر يجویندر چہل اور چائنامین بولر کلدیپ یادو دونوں کو اتارے یا پھر ان میں سے ایک کو اتار کر جڈیجہ کی لیفٹ آرم اسپن پر انحصار کرے۔

کلدیپ کی آئی پی ایل میں کارکردگی اچھی نہیں رہی تھی اور نیوزی لینڈ کے خلاف پریکٹس میچ میں وہ کوئی وکٹ نہیں لے پائے تھے۔ کلدیپ کو بنگلہ دیش کے خلاف پریکٹس میچ میں اپنے پہلے اسپیل میں کوئی وکٹ نہیں ملا تھا لیکن دوسرے اسپیل میں اپنی لے حاصل کرتے ہی انہوں نے تین وکٹ لئے تھے۔کلدیپ اور چہل کا ایک ساتھ تال میل بہت خطرناک رہتا ہے۔ اگر ان دونوں اور جڈیجہ کو اتارا جاتا ہے تو ہندستان کو اپنے تیز حملے میں کٹ کرنا ہوگا۔ جسپريت بمراه اتریں گے اور دوسرے فاسٹ بولر کے لئے بھونیشور کمار اور محمد سمیع کے درمیان مقابلہ رہے گا۔ تیسرے فاسٹ بولر کا کردار پانڈیا ادا کر سکتے ہیں۔

ہندستان کو اپنے دونوں تجربہ کار اوپنروں شکھر اور روہت سے اچھا آغاز درکار رہے گا کیونکہ دونوں نے پریکٹس میچوں میں مایوس کیا تھا۔ انگلینڈ کی پچوں پر اچھا آغاز بہت ضروری ہے جس سے آگے آنے والے بلے بازوں پر دباؤ کام رہے۔ دنیا کے نمبر ایک بلے باز وراٹ کوہلی کے لئے یہ امتحان کی سب سے بڑی گھڑی ہے۔ وہ دنیا کے بہترین بلے باز ہیں لیکن اگر انہیں عظیم بننا ہے تو انہیں ورلڈ کپ جیتنا ضروری ہو گا ۔وراٹ ٹورنامنٹ میں فاتحانہ شروعات کرنا چاہتے ہیں تاکہ ٹیم اعتماد کے ساتھ ورلڈ کپ میں اپنے سفر کو آگے بڑھا سکے۔

دوسری طرف مسلسل دو الٹ پھیرسے مایوس جنوبی افریقہ جیت کی تال پر لوٹنا چاہے گی اور اس کے لئے اسے ہندستان کے خلاف زبردست مظاہرہ کرنا پڑے گا، اگرچہ یہ ٹیم اپنے کھلاڑیوں کی چوٹوں سے زیادہ پریشان ہے۔ بنگلہ دیش کے ہاتھوں شرمناک شکست کا سامنا کے بعد جنوبی افریقہ کی ٹیم پر پھر سوال اٹھنے لگے ہیں اور اس ٹیم کو سیمی فائنل کی دوڑ میں رہنے کے لیے نئی حکمت عملی بنانی ہوگی۔ جنوبی افریقہ کے لئے گزشتہ میچ میں بنگلہ دیش سے ملی 21 رن کی شکست گہرا زخم دینے والی رہی تھی اور اسے اس سے ابرنا ہے۔

جنوبی افریقہ کے کپتان فاف ڈو پلیسس نے اعتراف کیا ہے کہ ان کی ٹیم کو ایک نئی حکمت عملی تیار کرنی ہوگی اور زیادہ متحد ہوکر کھیلنا ہوگا تبھی اس کی امیدیں بنی رہ سکتی ہیں۔ لیکن ٹیم کے لیے مسائل کم ہونے کے بجائے بڑھتے جارہے ہیں۔ ٹیم کے فاسٹ بولر لنگی اینگدي ہیمسٹرنگ چوٹ کی وجہ سے اب کم از کم 10 دنوں تک مقابلے سے باہر رہیں گے اور ہندستان کے خلاف ہونے والے میچ میں ٹیم کا حصہ نہیں بن پائیں گے۔

جنوبی افریقہ کے ایک اور بولر تجربہ کار ڈیل اسٹین اپنے کندھے کی چوٹ سے نکل رہے ہیں جبکہ اوپنر ہاشم آملہ ہیلمیٹ میں گیند لگنے کے بعد گزشتہ میچ میں نہیں کھیل سکے تھے۔ اگرچہ ٹیم کو امید ہے کہ آملہ ہندستان کے خلاف میچ تک فٹ ہو جائیں گے۔ڈو پلیسس نے کہا ہے کہ ان کا پلان اے اب چوپٹ ہو چکا ہے اور انہیں نئے پلان پر کام کرنا ہوگا۔ کپتان نے کہاکہ ہمیں ٹیم کے حوصلے کو اٹھانا ہوگا۔ ہمیں یہ خیال رکھنا ہوگا کہ اس کے تیسرے میچ میں ہمارا مقابلہ دنیا کی نمبر دو ٹیم ہندستان سے ہے۔ ہم جانتے ہیں کہ اس وقت ہم اچھا نہیں کھیل رہے ہیں لیکن ہمیں چیزوں کو جلد تبدیل کرنا هوگامیں وعدہ کرتا ہوں کہ ہم اگلے میچ میں واپس آ جائیں گے۔

ہندستان کے خلاف میچ کے لیے جنوبی افریقہ کو اپنے بچے ہوئے اختیارات تلاش کرنے ہوں گے۔ ڈوائن پرٹوريس کو تیز بولنگ آل راؤنڈر کے طور پر اتارا جا سکتا ہے جبکہ تبریز شمسی کو عمران طاہر کے ساتھ ا سپن جوڑی دار بنایا جا سکتا ہے۔ لیکن جنوبی افریقہ کے لئے اس وقت سب سے بڑا سردرد ایک فٹ الیون کو اتارنا ہے۔