پہلا ٹسٹ: ہندوستان کی جُنوبی افریقہ پر فتح، سیریز میں ایک صفر سے برتری

وشاکھا پٹنم کے اے سی اے-سی ڈی سی اے میدان پر کھیلے گئے تین میچوں کی سیریز کے پہلے ٹسٹ مقابلہ میں ٹیم انڈیا نے شاندار جیت درج کی ہے۔ ہندوستان نے جنوبی افریقہ کے خلاف پہلا ٹسٹ میچ 203 رنوں سے اپنے نام کیا ہے۔ اس کے ساتھ ہی ہندوستان نے تین میچوں کی سیریز میں 1-0 سے برتری حاصل کر لی ہے۔

دوسری اننگ میں محمد سمیع نے شاندر گیند بازی کی اور پانچ وکٹ حاصل کیے، جبکہ رویندر جڈیجہ نے 4 اور روی چندرن اشون نے ایک وکٹ حاصل کیا۔ سیریز کا دوسرا میچ پونے میں 10 اکتوبر کو کھیلا جائے گا۔

قبل ازیں، ٹیم انڈیا نے پہلی اننگ میں ٹاس جیت کر پہلے بلے بازی کرتے ہوئے 7 وکٹ پر 502 رن اسکور کیے اور اننگ کا اعلان کر دیا تھا۔ جواب میں جنوبی افریقہ 431 رنوں پر آل آؤٹ ہو گئی، ہندوستان کو پہلی اننگ کی بنیاد پر 71 رنوں کی سبقت حاصل ہوئی۔

دوسری اننگ میں ہندوستان نے 4 وکٹ کے نقصان پر 323 رن اسکور کیے اور جنوبی افریقہ کے سامنے 395 رنوں کا ہدف رکھا۔ 395 رنوں کے بڑے ہدف کا تعاقب کرتے ہوئے جنوبی افریقی ٹیم لنچ کے بعد 191 رنوں تک محدود رہ گئی۔ اس کے ساتھ ہی ٹیم انڈیا نے شاندار جیت درج کی۔