جب پاکستانی کھلاڑی شاداب نے باندھے پانڈیا کے جوتے کے فیتے، اسپورٹس مین شپ کی خوبصورت تصویر

نئی دہلی: نفرت کے دور میں کرکٹ کے میدان سے محبت کی تصویر ابھری ہے۔ یہ تصویر ایشیا کپ میں ہفتہ کو ہندوستان اور پاکستان کے درمیان کھیلے جانے والے میچ کی ہے۔ سوشل میڈیا پر اس تصویر کا کافی چرچا ہو رہا ہے۔ اسے کافی پسند بھی کیا جا رہا ہے۔ یہ تصویر ہاردک پانڈیا اور پاکستانی کھلاڑی شاداب خان کی ہے۔ تصویر میں دیکھا جا سکتا ہے کہ پاکستانی کھلاڑی شاداب خان ہاردک پانڈیا کے جوتے کے فیتے باندھ رہے ہیں۔ لوگوں نے شاداب کی اسپورٹس مین شپ کی تعریف کی ہے۔

ٹیم انڈیا نے پاکستان کے خلاف ٹاس جیت کر پہلے بیٹنگ کا فیصلہ کیا تھا۔ ہاردک چھٹے نمبر پر بلے بازی کرنے میدان میں آئے۔ ہندوستان کی اننگز کے دوران پانڈیا کے جوتے کے فیتے ڈھیلے پڑ گئے۔ پاکستانی کرکٹر شاداب خان نے جیسے ہی یہ دیکھا وہ ہاردک کی مدد کے لیے پہنچ گئے۔ جذبہ کھیل کا مظاہرہ کرتے ہوئے شاداب نے ہاردک کو جوتے کے تسمے باندھ دئے۔ جس پر ان کی تعریف کی جارہی ہے۔ شاداب اور ہاردک کی تصویر سوشل میڈیا پر خوب شیئر کی جا رہی ہے۔

ہاردک نے اس میچ میں ہندوستان کے لیے شاندار کارکردگی کا مظاہرہ کیا۔ انہوں نے 87 رنز کی اہم اننگز کھیلی۔ اس میچ میں ہاردک نے ایشان کشن کے ساتھ مل کر اپنی ٹیم کو مشکل سے نکالا۔ ہندوستانی ٹیم 66 رنز کے اسکور پر 4 وکٹیں گنوا چکی تھی۔ اس کے بعد ایشان اور ہاردک نے سنچری کی شراکت داری کی۔ پانڈیا نے 90 گیندوں میں 87 رنز بنائے۔ انہوں نے 7 چوکے اور ایک چھکا بھی لگایا۔ جبکہ ہی ایشان نے 81 گیندوں میں 82 رنز بنائے، انہوں نے 9 چوکے اور 2 چھکے بھی لگائے۔