پرتھ ون ڈے میں ٹیم انڈیا کی مایوس کن کارکردگی، آسٹریلیا نے 7 وکٹ سے ہرایا

پرتھ: ہندوستان اور آسٹریلیا کے درمیان تین ایک روزہ میچوں کی سیریز کے پہلے مقابلے میں میزبان آسٹریلیا نے شاندار کارکردگی دکھاتے ہوئے ہندوستان کو 7 وکٹ سے شکست دی۔ بارش سے متاثرہ اس میچ میں آسٹریلیا کو ڈی ایل ایس (ڈلورتج لوئس اسٹرن) قانون کے تحت 131 رنز کا ہدف ملا تھا، جسے ٹیم نے 21.1 اوور میں تین وکٹ کے نقصان پر حاصل کر لیا۔

ہدف کا تعاقب کرتے ہوئے آسٹریلیا کی شروعات اچھی نہیں رہی۔ ٹریوس ہیڈ صرف 8 رنز بنا کر آؤٹ ہوئے، جبکہ دوسرے اوپنر میٹ شارٹ بھی 8 رنز ہی جوڑ سکے۔ دونوں ابتدائی وکٹیں جلد گرنے کے بعد ٹیم دباؤ میں آ گئی، لیکن کپتان مِشیل مارش اور وکٹ کیپر بلے باز جوش فلیپ نے ٹیم کو بحران سے نکالا۔ دونوں نے تیسری وکٹ کے لیے 55 رنز کی قیمتی شراکت قائم کی۔

جوش فلیپ نے 29 گیندوں پر دو چھکوں اور تین چوکوں کی مدد سے 37 رنز کی تیز رفتار اننگز کھیلی۔ ان کے آؤٹ ہونے کے بعد میتھیو رینشا بیٹنگ کے لیے آئے اور انہوں نے 24 گیندوں پر 21 رنز بنا کر کپتان کا ساتھ دیا۔ دوسری جانب مشیل مارش نے شاندار کپتانی اننگز کھیلتے ہوئے صرف 52 گیندوں پر 3 چھکوں اور 2 چوکوں کی مدد سے ناقابلِ شکست 46 رنز بنائے۔ ان کی پرسکون بلے بازی نے ٹیم کو آسان فتح دلائی۔

ہندوستانی بولرز کی بات کی جائے تو عرشدیپ سنگھ، اکشر پٹیل اور واشنگٹن سندر نے ایک ایک وکٹ حاصل کی۔ تاہم، باقی گیندباز آسٹریلوی بلے بازوں پر دباؤ برقرار رکھنے میں ناکام رہے۔

قبل ازیں، ہندوستانی ٹیم نے ٹاس ہارنے کے بعد پہلے بیٹنگ کرتے ہوئے 26 اوورز میں 9 وکٹ کے نقصان پر 136 رنز بنائے۔ بارش کی مداخلت کے سبب میچ کو 50 اوورز سے گھٹا کر 26 اوورز کا کر دیا گیا تھا۔

ہندوستانی اننگز کا آغاز مایوس کن رہا۔ تقریباً سات ماہ بعد بین الاقوامی کرکٹ میں واپسی کرنے والے روہت شرما صرف 14 گیندوں پر 8 رنز بنا کر آؤٹ ہوئے، جبکہ ویرات کوہلی 8 گیندوں پر بغیر کوئی رن بنائے پویلین لوٹے۔ شرے ایس ایئر نے 11 رنز اور واشنگٹن سندر نے 10 رنز بنائے۔

اننگز کو کے ایل راہل اور اکشر پٹیل نے سنبھالا۔ راہل نے 31 گیندوں پر 2 چھکوں اور 2 چوکوں کی مدد سے 38 رنز بنائے، جبکہ اکشر نے 38 گیندوں پر 31 رنز جوڑے۔ آخر میں نتیش کمار ریڈی نے 11 گیندوں پر 2 چھکوں کی مدد سے ناقابلِ شکست 19 رنز بنا کر ٹیم کو 136 تک پہنچایا۔

آسٹریلیا کی جانب سے مچل اسٹارک اور نیتھن ایلس نے ایک ایک، جبکہ جوش ہیزل وُڈ، مچل اووین اور میتھیو کُونیمن نے دو دو وکٹیں حاصل کیں۔ اس جیت کے ساتھ آسٹریلیا نے تین میچوں کی سیریز میں 1-0 کی برتری حاصل کر لی۔