ویسٹ انڈیز بورڈ کی بدانتظامی پر ناراض ہوئے ہاردک پانڈیا، بنیادی سہولیات کی کمی پر اظہارِ افسوس

ہندوستانی کرکٹ ٹیم اس وقت ویسٹ انڈیز میں ہے۔ ٹیسٹ اور یک روزہ میچوں کی سیریز پر ہندوستانی ٹیم نے قبضہ کر لیا ہے اور 3 اگست سے 5 ٹی-20 میچوں کی سیریز شروع ہوگی۔ لیکن اس سے ٹھیک پہلے ہاردک پانڈیا نے ایک ایسا بیان دے دیا ہے جو ویسٹ انڈیز بورڈ کے لیے فکر انگیز ہے۔ دراصل ہاردک نے ویسٹ انڈیز میں رہنے کے دوران بنیادی سہولیات کی کمی پر افسوس ظاہر کیا ہے اور کہا ہے کہ کرکٹ ویسٹ انڈیز کے لیے وقت آ گیا ہے کہ وہ اس معاملے پر توجہ دے اور اس کا حل نکالے۔

واضح رہے کہ 3 یک روزہ میچوں کی سیریز کا آخری میچ یکم اگست کو ہندوستان اور ویسٹ انڈیز کے درمیان کھیلا گیا تھا۔ اس مقابلے میں ہندوستانی ٹیم کی کپتانی ہاردک پانڈیا ہی کر رہے تھے جس میں ہندوستان کو 200 رنوں سے جیت ملی تھی۔ اس جیت کے ساتھ ہی ہندوستانی ٹیم نے یہ سیریز 1-2 سے جیت لی۔ میچ کے بعد ہارک پانڈیا نے کہا کہ ’’یہ ان سب اچھے میدانوں میں سے ایک تھا جہاں ہم نے کھیلا ہے۔ امید ہے کہ اگلی بار جب ہم ویسٹ انڈیز آئیں گے تو چیزیں بہتر ہوں گی۔ سفر سے لے کر کئی چیزوں کو اچھے سے مینیج کرنا شامل ہے۔ گزشتہ سال بھی کچھ دقتیں ہوئی تھیں۔ مجھے لگتا ہے کہ اب ویسٹ انڈیز کرکٹ کے لیے اس پر توجہ دینے اور یہ یقینی کرنے کا وقت آ گیا ہے کہ جب کوئی ٹیم سفر کرے تو سب کچھ بہتر ہو۔ ہم لگژری کا مطالبہ نہیں کر رہے، لیکن انھیں کچھ بنیادی ضرورتوں کا دھیان رکھنا ہوگا۔‘‘

ہاردک پانڈیا نے اپنی بات کو آگے بڑھاتے ہوئے کہا کہ ’’یہاں آ کر اور کچھ اچھے کرکٹ کا لطف لے کر اچھا لگا۔‘‘ اس سے پہلے ہندوستانی کرکٹروں نے بی سی سی آئی کے تئیں اپنی ناراضگی ظاہر کی تھی کیونکہ ترینداد سے بارباڈوس کے لیے ان کی دیر رات کی پرواز میں تقریباً چار گھنٹے کی تاخیر ہوئی تھی، جس سے انھیں وَنڈے سیریز کے شروعاتی میچ سے پہلے اچھی نیند نہیں مل پائی تھی۔