گنگولی ہندوستان کے سب سے بہترین کپتان: عرفان پٹھان

نئی دہلی: ہندوستانی کرکٹ ٹیم کے سابق سرکردہ آل راؤنڈر عرفان پٹھان سورو گنگولی کو ہندوستان کا سب سے کامیاب اور بہترین کپتان قرار دیتے ہوئے کہا کہ گنگولی جانتے تھے کہ انہیں کس کھلاڑی کا ساتھ دینا ہے اور کون سا کھلاڑی مستقبل میں ٹیم کی فتوحات میں معاون ہوسکتا ہے۔ سابق ہندوستانی کپتان سورو گنگولی کو ہندوستانی کرکٹ کے سب سے کامیاب کپتان میں سے ایک سمجھا جاتا ہے۔ انہوں نے 2000 کی دہائی میں ہندوستانی کرکٹ میں انقلاب برپا کیا تھا۔ گنگولی کے پاس سچن تندولکر، راہل دراوڑ، وی وی ایس لکشمن، جوگل سری ناتھ اور انل کمبلے جیسے کھلاڑی تھے۔ اس کے باوجود انہوں نے یوراج سنگھ، وریندر سہواگ، ہربھجن سنگھ، عرفان پٹھان اور مہندر سنگھ دھونی جیسے نوجوان کھلاڑیوں کو موقع اور مدد فراہم کی۔

ایک حالیہ انٹرویو میں جب سابق ہندوستانی فاسٹ بالر عرفان پٹھان سے ہندوستانی کرکٹ کے بہترین کپتان کا نام پوچھا گیا تو انہوں نے سورو گنگولی کا نام لیا۔عرفان پٹھان نے کہا کہ سورو گنگولی جانتے تھے کہ انہیں کس کھلاڑی کا ساتھ دینا ہے۔ وہ ایک اچھی ٹیم بنانے میں یقین رکھتے تھے۔ مجھے یاد ہے کہ یوراج سنگھ اپنے کیریئر کے آغاز کے لئے جدوجہد کر رہے تھے۔ گنگولی نے اس کی حمایت کی۔ پٹھان نے کہا کہ وہ جانتے تھے کہ کون سا کھلاڑی مستقبل میں ٹیم کی فتوحات میں معاون ہوسکتا ہے۔

گنگولی کے اس نقطہ کی تصدیق یوراج سنگھ نے کی اور وہ کئی ٹیموں کی فتوحات کے ہیرو تھے۔ 2002 میں یوراج نے محمد کیف کے ساتھ مل کر لارڈز میں نیٹ ویسٹ ٹرافی کے فائنل میں 326 رنز کے تعاقب میں ہندوستان کو فتح سے ہمکنار کیا تھا۔ 2007 کے ٹی 20 ورلڈ کپ میں وہ اسٹار کھلاڑی تھے۔ انگلینڈ کے خلاف انہوں نے اسٹورٹ براڈ کے ایک اوور میں چھ چھکے لگا کر تاریخ رقم کی تھی۔ وہ 2011 کے ون ڈے ورلڈ کپ میں 'مین آف دی سیریز' تھے۔

عرفان پٹھان نے کہا کہ سورو گنگولی نے نہ صرف یوراج سنگھ، بلکہ ہربھجن سنگھ اور ظہیر خان کی بھی حمایت کی۔ گنگولی نے مشکل وقتوں میں ہندوستانی کرکٹ کو آگے بڑھایا۔ لہذا جب ہم قائد کی بات کرتے ہیں تو گنگولی کا نام سامنے آتا ہے۔ وہ کھلاڑیوں کا قائد تھا۔ ان کا ایک ہی ایجنڈا تھا کہ ہندوستانی کرکٹ ٹیم کو صرف آگے بڑھنا چاہیے۔