پہلا ٹیسٹ: جنوبی افریقہ کی نصف ٹیم 120 رنز پر پویلین لوٹی، بمراہ اور کلدیپ کا جلوہ
ایڈن گارڈنز میں پہلے ٹیسٹ کے دوسرے سیشن تک جنوبی افریقہ 120 رنز پر پانچ وکٹیں گنوا چکا ہے۔ بمراہ نے شاندار اسپیل میں 3، جبکہ کلدیپ یادو نے دو وکٹیں حاصل کیں
کولکاتا کے ایڈن گارڈن میں کھیلے جا رہے پہلے ٹیسٹ میں ہندوستنای گیندبازوں نے شاندار کارکردگی دکھاتے ہوئے دوسرے سیشن میں جنوبی افریقہ کی نصف ٹیم کو صرف 120 رنز پر پویلین لوٹا دیا۔ ٹاس جیت کر پہلے بلے بازی کرنے والی مہمان ٹیم مضبوط شروعات کے باوجود ہندوستانی حملے کے سامنے زیادہ دیر مزاحمت نہ کر سکی اور وقفے وقفے سے اہم وکٹیں کھوتی رہی۔
جنوبی افریقہ نے اننگز کا آغاز پُراعتماد طریقے سے کیا۔ ایڈن مارکرام اور رائن رکیلٹن نے پہلی وکٹ کے لیے 57 رنز کی شراکت نبھائی اور انڈین گیندبازوں پر ابتدائی دباؤ قائم کیا لیکن جیسے ہی جسپریت بمرہ کو ریدم ملا میچ کی صورتِ حال یکسر بدل گئی۔ کبمراہ نے رکیلٹن کو 23 رنز پر چلتا کیا اور پھر جلد ہی مارکرام کو بھی 31 رنز پر رشبھ پنت کے ہاتھوں کیچ کرا دیا۔
وِیان مُلڈر نے کریز پر قدم جمانے کی کوشش کی مگر کلدیپ یادو کی گھومتی ہوئی گیند نے انہیں زیادہ دیر ٹکنے نہیں دیا۔ کپتان ٹمبا باووما بھی کلدیپ کی گیند پر صرف 3 رنز بنا کر جرّیل کے ہاتھوں کیچ آؤٹ ہوئے، جس کے ساتھ ہی مہمان ٹیم دباؤ میں آ گئی۔
تین وکٹیں جلد گرنے کے بعد ٹونی ڈی زورزی اور ٹرِسٹن اسٹبز نے اننگز کو سنبھالنے کی کوشش کی، مگر بمراہ نے اس جوڑی کو بھی زیادہ دیر جم کر کھیلنے نہ دیا۔ ڈی زورزی 24 رنز بنانے کے بعد بمراہ کا تیسرا شکار بنے۔ دوسری جانب اسٹبز نے محتاط بیٹنگ جاری رکھی، مگر رن ریٹ سست پڑتا گیا اور بھارتی گیندبازوں کی دھواں دار لائن نے انہیں کھل کر کھیلنے کا موقع نہ دیا۔
120 رنز پر پانچویں وکٹ گرنے کے بعد جنوبی افریقہ کی اننگز دباؤ میں آ چکی تھی۔ کائل ورین نے 14 رنز بنا کر کچھ مزاحمت دکھانے کی کوشش کی، مگر وکٹ کی رفتار مسلسل رک کر گرتی رہی۔ میدان میں موجود بھارتی کھلاڑیوں کا جوش و خروش اور باؤلرز کی مستحکم حکمت عملی نے مہمان ٹیم کو کھل کر اسکور بنانے کا موقع نہیں دیا۔
بھارت کی طرف سے جسپریت بمراہ سب سے کامیاب گیندباز ثابت ہوئے۔ انہوں نے 12 اووروں میں صرف 23 رنز دے کر 3 اہم وکٹیں حاصل کیں۔ ان کی سوئنگ، رفتار اور لائن نے جنوبی افریقی بیٹرز کو مسلسل پریشان رکھا۔ اسپن محاذ پر کلدیپ یادو نے شاندار بولنگ کرتے ہوئے 35 رنز کے عوض دو وکٹیں اپنے نام کیں۔ بھارتی باؤلرز نے مجموعی طور پر فلائٹ، اسپن اور رفتار کے امتزاج سے ایسا دباؤ بنایا کہ جنوبی افریقی بیٹنگ لائن سنبھل نہ سکی۔
میچ میں رشبھ پنت کی واپسی بھی نمایاں رہی۔ انہوں نے وکٹ کے پیچھے شاندار فیلڈنگ دکھاتے ہوئے اہم کیچ پکڑے اور ٹیم کی وابستہ توقعات پر پورا اترنے کی کوشش کی۔
اب جنوبی افریقہ کے ہاتھ میں صرف پانچ وکٹیں باقی ہیں اور ٹیم 150 کے ہندسے کو عبور کرنے کے لیے بھی جدوجہد کرتی دکھائی دے رہی ہے۔ بھارتی ٹیم کے پاس میچ پر مضبوط گرفت بنانے کا بہترین موقع ہے، اور اگر گیندباز یہی کارکردگی برقرار رکھتے ہیں تو جنوبی افریقہ کے لیے بڑا مجموعہ کھڑا کرنا مشکل ہو جائے گا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔