پاکستان میں کرکٹ میچ کے دوران دھماکہ، ایک شخص جاں بحق، متعدد زخمی

پاکستان کے صوبہ خیبر پختونخواہ میں کرکٹ میچ کے دوران ایک اسٹیڈیم میں دھماکہ ہوا۔ اس دھماکے میں ایک شخص جاں بحق جب کہ متعدد افراد زخمی ہوئے۔ پاکستانی میڈیا رپورٹس کے مطابق پولیس نے کہا کہ دھماکا آئی ای ڈی (امپروائذڈایکس پلوسیو  ڈیوائس  ) سے کیا گیا اور اسے ٹارگٹڈ حملہ تصور کیا جا رہا ہے۔ واقعہ تحصیل خار کے کوثر کرکٹ گراؤنڈ میں پیش آیا۔

دھماکے کی ویڈیومیں  لوگ اپنی جان بچانے کے لیے ادھر ادھر بھاگتے نظر آ رہے ہیں جب کہ پیچھے سے گہرا دھواں اٹھتا دکھائی دے رہا ہے۔ دھماکے کے بعد زمین میں افراتفری مچ گئی اور زخمیوں کو قریبی اسپتالوں میں داخل کرایا گیا۔ سیکورٹی فورسز نے علاقے کو گھیرے میں لے لیا ہے۔ حکام کا کہنا ہے کہ یہ واقعہ دہشت گردانہ حملے کی طرف اشارہ کرتا ہے۔

یہ حملہ ایک ایسے وقت میں ہوا ہے جب حالیہ دنوں میں صوبہ خیبر پختونخواہ میں دہشت گردی کے واقعات کی مسلسل خبریں آرہی ہیں۔ گزشتہ ہفتے ایک پولیس اسٹیشن پر حملہ کیا گیا تھا۔

ڈان کی رپورٹ کے مطابق ایک مقامی پولیس افسر نے بتایا کہ زخمیوں کو فوری طور پر ضلعی اسپتال بھیج دیا گیا۔ ابھی تک کسی نے اس حملے کی ذمہ داری قبول نہیں کی ہے۔ سیکیورٹی حکام کا اندازہ ہے کہ دہشت گردوں کی جانب سے یہ حملہ سیکیورٹی فورسز کی جانب سے چند ہفتے قبل شروع کیے گئے انسداد دہشت گردی آپریشن 'آپریشن سربکف' کے جواب میں کیا گیا ہے۔

ڈان کے مطابق ڈسٹرکٹ پولیس آفیسر وقاص رفیق نے بتایا کہ دھماکا تحصیل خار کے کوثر کرکٹ گراؤنڈ میں ہوا اور یہ دیسی ساختہ بم سے کیا گیا۔ انہوں نے کہا کہ ایسا لگتا ہے کہ یہ حملہ کسی خاص ہدف پر کیا گیا ہے۔ گزشتہ ہفتے بھی تحصیل لوئی ماموند کے علاقے لغاری میں دہشت گردوں نے پولیس اسٹیشن پر حملہ کیا تھا جس میں ایک پولیس اہلکار سمیت دو افراد زخمی ہوئے تھے۔(بشکریہ نیوز پورٹل ’آج تک‘)