دھونی یوم آزادی کے روز بین الاقوامی کرکٹ سے ہوئے سبکدوش تو رینا نے بھی کیا ریٹائرمنٹ کا اعلان

دھونی نے انسٹا گرام پوسٹ پر یہ اعلان کرتے ہوئے کہا کہ میرے کیرئر میں آپ سب کے پیار اور تعاون کا بہت بہت شکریہ۔ آج سات بجکر 29 منٹ سے آپ مجھے کرکٹ سے ریٹائر سمجھیں۔

تصویر سوشل میڈیا
تصویر سوشل میڈیا
user

یو این آئی

نئی دہلی: دو بار عالمی کپ جیتنے والی ہندوستانی کرکٹ ٹیم کے سب سے کامیاب کپتانوں میں سے ایک مہندر سنگھ دھونی نے یوم آزادی کے دن سنیچر کو بین الاقوامی کرکٹ سے ریٹائرمنٹ لینے کا اعلان کردیا۔ تو وہیں ہندوستانی کرکٹر اور چنئی سپر کنگس میں ان کے ساتھی کھلاڑی سریش رینا نے بھی بین الاقوامی کرکٹ سے ریٹائرمنٹ لینے کا اعلان کردیا ہے۔ ہندوستان کے سب سے کامیاب وکٹ کیپر بلے باز دھونی نے انسٹا گرام پوسٹ پر یہ اعلان کرتے ہوئے کہا کہ ’’میرے کیرئر میں آپ سب کے پیار اور تعاون کا بہت بہت شکریہ۔ آج سات بجکر 29 منٹ سے آپ مجھے کرکٹ سے ریٹائر سمجھیں‘‘۔

دھونی نے اس پوسٹ میں یہ ذکر نہیں کیا کہ وہ کس فارمیٹ سے ریٹائرمنٹ لے رہے ہیں۔ دھونی ٹسٹ کرکٹ سے پہلے ہی ریٹارئرمنٹ لے چکے تھے اور پچھلے سال انگلینڈ میں ہوئے ون ڈے عالمی کپ کے سیمی فائنل میں نیوزی لینڈ کے ہاتھوں ہندوستان کی شکست کے بعد انہوں نے کوئی میچ نہیں کھیلا ہے۔


دھونی کے آئی پی ایل کے 13 ویں ایڈیشن میں کھیلنے کی امید ہے جس کے لئے وہ رانچی سے چنئی پہنچ چکے ہیں۔ چنئی میں اتوار سے چنئی سپر کنگس کا چھ دن کا کنڈیشننگ کیمپ ہونا ہے۔ تین بار کے آئی پی ایل فاتح دھونی چنئی ٹیم کے کپتان ہیں۔ دھونی نے چنئی آنے سے قبل اپنی آبائی ریاست رانچی میں کورونا ٹسٹ کرایا تھا جس کی رپورٹ نیگیٹو آنے کے بعد وہ جمعہ کو چنئی کے لئے روانہ ہوئے تھے۔

سال 2007 میں اپنی کپتانی میں پہلا ٹی۔ 20 عالمی کپ جیتنے والے دھونی نے ہندوستان کو 28 سال کے طویل وقفے کے بعد 2011 میں یک روزہ عالمی چمپئن بنایا تھا۔ ہندوستان نے ان کی کپتانی میں آئی سی سی چمپئن ٹرافی بھی جیتی ہے اور ٹیم انڈیا ان کی کپتانی میں ٹسٹ رینکنگ میں نمبر ایک بھی بنی تھی۔


وہیں مہندر سنگھ دوھونی کے ریٹائرمنٹ لینے کے اعلان کے بعد ہندوستانی کرکٹر اور چنئی سپر کنگس میں ان کے ساتھی کھلاڑی سریش رینا نے بھی بین الاقوامی کرکٹ سے ریٹائرمنٹ لینے کا اعلان کردیا ہے۔ بائیں ہاتھ کے بلے باز رینا نے سوشل میڈیا کے ذریعہ اپنے ریٹائرمنٹ کا اعلان کیا ہے۔ دھونی کے ریٹائرمنٹ کے اعلان کے فوراً بعد ہی رینا نے اپنے سوشل میڈیا پوسٹ پر لکھا کہ وہ بھی دھونی کے اس سفر میں شامل ہو رہے ہیں۔ رینا نے اپنے انسٹا گرام اکاؤنٹ پر ایک تصویر شیئر کی ہے اور اس تصویر کے ساتھ انہوں نے لکھا ’’ماہی آپ کے ساتھ کھیلنا اچھا تھا۔ پورے دل سے، فخر کے ساتھ، میں آپ کے اس سفر میں شامل ہونا چاہتا ہوں۔ تھینک کیو انڈیا۔ جے ہند‘‘۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 15 Aug 2020, 9:25 PM