عالمی کپ 2023: انگلینڈ کے خلاف میچ سے قبل ہندوستانی کپتان روہت شرما نے دیا حوصلہ افزا بیان

ہندوستان اور انگلینڈ کے درمیان 29 اکتوبر کو لکھنؤ میں میچ کھیلا جانا ہے، لیکن اس کے لیے ہندوستانی ٹیم نے 26 اکتوبر سے ہی لکھنؤ میں پریکٹس کرنا شروع کر دیا ہے۔ اس درمیان روہت شرما نے عالمی کپ اور ہندوستانی ٹیم سے متعلق اپنے نظریات ظاہر کیے ہیں۔ انھوں نے بتایا ہے کہ کس طرح وہ ٹیم کو متحد رکھنے کی کوشش کر رہے ہیں اور میدان میں کس طرح حالات کو بہتر اپنے حق میں بہتر بنا رہے ہیں۔

دراصل ہندوستانی کپتان اور سلامی بلے باز روہت شرما کے لیے یہ عالمی کپ اب تک شاندار رہا ہے۔ ان کی قیادت میں ہندوستان نے اپنے سبھی پانچ میچ جیت لیے ہیں اور روہت شرما کی بلے بازی بھی کمال کی رہی ہے۔ انگلینڈ کے خلاف میچ سے قبل روہت نے کہا کہ ’’مجھے لگتا ہے کہ جب کھلاڑیوں کو منظم کرنے کی بات آتی ہے تو یہ بہت اہم ہے کہ آپ اس کھلاڑی اور اس کی ضروریات کو سمجھیں۔ اس خاص کھلاڑی کی پسند اور ناپسند کو سمجھیں کیونکہ آپ جانتے ہیں کہ ٹیم کے کھیل میں یہ صرف ایک یا دو اشخاص یا کچھ کے بارے میں نہیں ہے۔ یہ سبھی کھلاڑی کے بارے میں ہے، کیونکہ مشترکہ کوشش سے ہی ٹیم فتحیاب ہو سکتی ہے۔‘‘

روہت شرما کا کہنا ہے کہ ’’ہم سمجھتے ہیں کہ جب آپ چمپئن شپ، بڑے ٹورنامنٹس جیتنا چاہتے ہیں تو ہر کسی کو پارٹی میں آنا ہوگا اور اپنا کردار نبھانا ہوگا۔ اس لیے یہ اہم ہے کہ آپ سبھی کو اچھی ذہنی حالت میں رکھیں۔ اس لیے ہر کسی کی بات سننا، یہ سمجھنا بہت اہم ہے کہ وہ کیا چاہتے ہیں، وہ کیسے کام کرنا چاہتے ہیں اور اس طرح کی چیزیں اور پھر آپ ہر چیز کو دھیان میں رکھتے ہیں اور آگے بڑھتے ہیں اور یہ کچھ ایسا ہے جو میں ہمیشہ کرتا ہوں۔‘‘