چیمپئنز ٹرافی 2025: ہندوستان فائنل میں، تاریخ رقم کرنے کا سنہری موقع

آئی سی سی چیمپئنز ٹرافی 2025 اب اپنے فائنل مرحلے میں داخل ہو چکی ہے اور ہندوستانی کرکٹ ٹیم نے شاندار کارکردگی کا مظاہرہ کرتے ہوئے فائنل میں جگہ بنا لی ہے۔ روہت شرما کی قیادت میں ٹیم انڈیا نے ناقابلِ شکست رہتے ہوئے اس بڑے ٹورنامنٹ کے فائنل میں قدم رکھا ہے، جہاں اس کا مقابلہ 9 مارچ کو نیوزی لینڈ سے ہوگا۔ یہ فیصلہ کن میچ دبئی انٹرنیشنل کرکٹ اسٹیڈیم میں کھیلا جائے گا۔

ہندوستانی ٹیم کے پاس اس بار ایک تاریخی موقع ہے۔ اگر ٹیم فائنل جیتنے میں کامیاب ہو جاتی ہے، تو وہ چیمپئنز ٹرافی کی تاریخ میں سب سے زیادہ تین مرتبہ یہ ٹائٹل جیتنے والی ٹیم بن جائے گی۔ اس وقت ہندوستان اور آسٹریلیا دونوں نے دو، دو مرتبہ یہ اعزاز حاصل کیا ہے۔ آسٹریلیا اس بار سیمی فائنل میں ہندوستان کے ہاتھوں شکست کھا کر باہر ہو چکا ہے، جس کے بعد ہندوستان کے پاس تاریخ رقم کرنے کا سنہری موقع ہے۔

ہندوستانی ٹیم نے پہلی مرتبہ 2002 میں یہ ٹورنامنٹ جیتا تھا، جب سری لنکا کے خلاف فائنل بارش کی نذر ہو گیا اور دونوں ٹیموں کو مشترکہ فاتح قرار دیا گیا۔ اس کے بعد 2013 میں مہندر سنگھ دھونی کی قیادت میں ہندوستان نے انگلینڈ کو شکست دے کر دوسری بار چیمپئن بننے کا اعزاز حاصل کیا تھا۔

2017 میں چیمپئنز ٹرافی کا انعقاد انگلینڈ میں ہوا، جہاں پاکستان نے فائنل میں ہندوستان کو 180 رنز سے شکست دے کر پہلی مرتبہ یہ ٹائٹل جیتا۔ اس کے بعد 2021 میں یہ ٹورنامنٹ ہونا تھا، مگر کورونا وبا کی وجہ سے اسے ملتوی کر دیا گیا۔ اب آٹھ سال بعد ایک بار پھر یہ ایونٹ کھیلا جا رہا ہے، جس میں ہندوستان شاندار کارکردگی کا مظاہرہ کر رہا ہے۔

چیمپئنز ٹرافی 2025 میں ہندوستانی اسکواڈ: روہت شرما (کپتان)، شبھمن گل (نائب کپتان)، وراٹ کوہلی، شریئس آئیر، کے ایل راہل (وکٹ کیپر)، رشبھ پنت (وکٹ کیپر)، ہاردک پانڈیا، رویندر جڈیجہ، اکشر پٹیل، کلدیپ یادو، ورون چکرورتی، ہرشت رانا، محمد شامی، ارشدیپ سنگھ اور واشنگٹن سندر۔