چمپئنز ٹرافی 2025: ہندوستان اور نیوزی لینڈ کی ٹیمیں زور آزمائی کے لیے تیار، کوہلی پوری کریں گے 'ٹرپل سنچری'

ہندوستانی ٹیم چمپئنز ٹرافی میں آج نیوزی لینڈ کے ساتھ لیگ مرحلے کا آخری مقابلہ کھیلنے کے لیے دبئی کے میدان میں اترے گی۔ دونوں ٹیمیں دو۔ دو میچ جیت کر ایک دوسرے کے آمنے سامنے ہو رہی ہیں۔ دونوں کی نظریں جیت کی ہیٹرک لگانے پر ٹکی ہیں۔ حالانکہ اس مقابلے میں جیت اور ہار سے کوئی زیادہ فرق نہیں پڑنے والا کیونکہ دونوں ہی ٹیمیں پہلے سیمی فائنل میں پہنچ چکی ہیں۔

ویسے کرکٹ شائقین کو اس میچ کا بے صبری سے انتظار ہے کیونکہ ہندوستان اور نیوزی لینڈ کی ٹیمیں کافی مضبوط ہیں اور دونوں ممالک کے درمیان دلچسپ مقابلے ہونے کی امید ہے۔ جو بھی ٹیم یہ میچ جیتے گی اس کے ٹورنامنٹ کے سیمی فائنل کے لیے حوصلے بلند ہو جائیں گے۔

ہندوستانی ٹیم کے پلیئنگ-11 کی بات کی جائے تو محمد شمی کو اس میچ میں آرام دیا جا سکتا ہے اور ان کی جگہ پر ارشدیپ سنگھ کھیل ہوئے نظر آ سکتے ہیں۔ ارشدیپ کو نیٹ پر خوب مشق کرتے ہوئے بھی دیکھا گیا ہے۔ نیوزی لینڈ کے پاس 5 بائیں ہاتھ کے بلے باز ہیں اور ایسے میں بائیں ہاتھ کے گیندباز اس ٹیم کے خلاف اثردار ثابت ہوسکتے ہیں۔ ٹیم انڈیا کے کپتان روہت شرما کے بھی کھیلنے پر تھوڑا شبہ ہے کیونکہ انہیں نیٹ پریکٹس کے دوران چوٹ لگ گئی تھی۔ حالانکہ ہفتہ کو ہوئی پریکٹس میں روہت پوری طرح فٹ نظر آئے تھے۔

اس میچ میں میدان میں اترنے کے ساتھ ہی وراٹ کوہلی ایک نیا ریکارڈ بنانے والے ہیں۔ دراصل وہ اپنا 300واں ایک روزہ مقابلہ کھیلیں گے۔ ٹیم اور کرکٹ شائقین کو وراٹ سے اس موقع پر یادگار اننگز کھیلنے کی امید ہے۔

واضح رہے کہ ٹیم انڈیا نے چمپئنز ٹرافی میں ابھی تک اپنے شاندار کھیل کا مظاہرہ کرتے ہوئے دونوں مقابلے بڑی آسانی سے جیتے ہیں۔ لیکن ٹیم کا اصلی امتحان اب شروع ہوا ہے جب آنے والے مقابلوں میں دنیا کی بہترین ٹیموں کے ساتھ اس کا سامنا ہوگا۔