آسٹریلیا کی انگلینڈ کے خلاف نو وکٹ سے جیت

برسبین: آف اسپنر نیتھن لیون (91 رن پر 4 وکٹ) نے شاندار گیند بازی کا مظاہرہ کرتے ہوئے پہلے ٹیسٹ کے چوتھے دن ہی اپنی ٹیم کے لئے جیت یقینی بنائی۔ تیسرے دن، ایک بہترین واپسی کی طرف گامزن انگلینڈ کے بلے بازوں کو لیون نے ڈھیرکر دیا۔ اس دوران انہوں نے ٹیسٹ کرکٹ میں اپنا 400واں وکٹ مکمل کرلیا۔ انگلینڈ نے چوتھے دن 74 رنز کے اندر اپنی آٹھ وکٹیں گنوا دیں۔ 297 پر آل آؤٹ ہونے کے بعد انگلینڈ نے آسٹریلیا کے سامنے 20 رنز کا ہدف رکھا تھا جسے اس نے ایک وکٹ کے نقصان پر حاصل کر لیا اور ایشز سیریز میں 1-0 کی برتری حاصل کر لی۔

چوتھے دن کی صبح لیون نے چار بلے بازوں کو پویلین کی راہ دکھائی جس میں 400ویں وکٹ کے طور پر ڈیوڈ ملان کا وکٹ شامل تھا۔ اس کے بعد کرس گرین نے روٹ کو 89 کے ذاتی اسکور پر وکٹ کیپر کے ہاتھوں کیچ آؤٹ کرا دیا۔ لیون نے 34 اوورز میں 91 رنز کے عوض چار وکٹ لئے جبکہ کپتان پیٹ کمنز اور گرین نے دو دو وکٹیں حاصل کیں۔ آسٹریلیا کی پہلی اننگ میں 152 رن کی شاندار سنچری کے لئے ٹریوس ہیڈ کو پلیئر آف دی میچ کا ایوارڈ ملا۔

آسٹریلیا کے لیے اس جیت کے باوجود میچ میں سب سے بڑی پریشانی یہ رہی کہ چوتھی اننگ میں ڈیوڈ وارنر بیٹنگ کے لیے میدان پر نہیں آئے۔ پہلی اننگ میں 94 رنوں کے نجی اسکور کے دوران بین اسٹوکس کی ایک گیند ان کی پسلیوں پر لگی تھی اور اس کے بعد انہوں نے انگلینڈ کی دوسری اننگ کے دران فیلڈنگ نہیں کی تھی۔

کرکٹ آسٹریلیا نے تیسرے دن ایک بیان جاری کرتے ہوئے کہا کہ ان کی پسلیوں میں چوٹ آئی ہے اور وارنر نے چوتھے دن کی صبح چینل سیون کو بتایا کہ وہ درد میں ہیں لیکن ضرورت پڑنے پر کچھ درد کش ادویات کی مدد سے بلے بازی ضرور کریں گے۔ حالانکہ آسٹریلیا کے سامنے ایک معمولی ہدف تھا جس کی وجہ سے وہ بلے بازی کرنے نہیں آئے۔ وارنر کے پاس دوسرے ٹیسٹ سے قبل فٹ ہونے کے لیے صرف چار دنوں کا وقت ہے۔