چیمپئنز ٹرافی سیمی فائنل: آسٹریلیا کا ٹاس جیت کر پہلے بلے بازی کا فیصلہ، ہندوستانی گیندبازوں کے لیے بڑا چیلنج

دبئی: چیمپئنز ٹرافی 2025 کے پہلے سیمی فائنل میں آسٹریلیا نے ہندوستان کے خلاف ٹاس جیت کر پہلے بلے بازی کرنے کا فیصلہ کیا۔ دبئی انٹرنیشنل کرکٹ اسٹیڈیم میں ہونے والے اس اہم مقابلے میں آسٹریلیا کے کپتان اسٹیو اسمتھ نے کہا کہ پچ بیٹنگ کے لیے سازگار دکھائی دے رہی ہے اور ان کی کوشش ہوگی کہ ایک بڑا اسکور کھڑا کیا جائے۔

ٹاس جیتنے کے بعد اسٹیو اسمتھ نے اعلان کیا کہ آسٹریلوی ٹیم میں دو تبدیلیاں کی گئی ہیں۔ میتھیو شارٹ کی جگہ کُوپر کونلی کو شامل کیا گیا ہے، جبکہ اسپینسر جانسن کی جگہ تنویر سنگھا کو موقع دیا گیا ہے۔

ادھر، ٹیم انڈیا کے کپتان روہت شرما نے کہا کہ وہ کسی بھی صورتحال کے لیے تیار تھے اور ٹاس ہارنے کو زیادہ اہمیت نہیں دے رہے۔ انہوں نے کہا، "ہم نے اپنی منصوبہ بندی کر رکھی ہے اور اس پر عمل کرنے کی کوشش کریں گے۔ خوشی کی بات یہ ہے کہ ہماری ٹیم میں کوئی تبدیلی نہیں کی گئی ہے، اور ہم اسی کمبی نیشن کے ساتھ میدان میں اتریں گے۔"

آسٹریلیا نے اپنی اننگز کا آغاز کُوپر کونلی اور ٹریوس ہیڈ کی اوپننگ جوڑی کے ساتھ کیا۔ ہندوستانی گیندبازوں کی نظریں جلد سے جلد ٹریوس ہیڈ کو پویلین بھیجنے پر مرکوز ہوں گی، کیونکہ وہ ایک خطرناک بلے باز سمجھے جاتے ہیں۔

ہندوستانی ٹیم کے لیے یہ مقابلہ خاصی اہمیت رکھتا ہے کیونکہ 2023 کے ون ڈے ورلڈ کپ کے فائنل میں آسٹریلیا نے ہندوستان کو شکست دی تھی۔ ایسے میں روہت شرما کی قیادت میں ہندوستانی ٹیم میدان میں بدلہ لینے کے عزم کے ساتھ اتری ہے۔

دونوں ٹیموں کی پلیئنگ الیون:

ہندوستان: روہت شرما (کپتان)، شبھمن گل، وراٹ کوہلی، شریاس آئر، اکشر پٹیل، کے ایل راہل (وکٹ کیپر)، ہاردک پانڈیا، رویندر جڈیجہ، محمد شامی، کلدیپ یادو، ورون چکرورتی۔

آسٹریلیا: کُوپر کونلی، ٹریوس ہیڈ، اسٹیون اسمتھ (کپتان), مارنس لابوشین, جوش انگلس (وکٹ کیپر), ایلکس کیری, گلین میکسویل, بین ڈوارشویس, ناتھن ایلس, ایڈم زامپا, تنویر سنگھا۔

یہ مقابلہ دونوں ٹیموں کے لیے انتہائی اہم ہے اور شائقینِ کرکٹ کی نظریں اس سنسنی خیز سیمی فائنل پر جمی ہوئی ہیں۔