ٹی ٹوینٹی عالمی کپ: افغانستان کا فاتحانہ اختتام، کناڈا کو شکست دے کر مہم مکمل کر لی
اگرچہ افغانستان کی ٹیم سیمی فائنل کی دوڑ سے باہر ہو چکی تھی، لیکن اس بڑی جیت کے ساتھ انہوں نے ٹورنامنٹ کا باوقار اختتام کیا۔
ابراہیم زدران کی جارحانہ بیٹنگ اور محمد نبی کی تباہ کن بالنگ کی بدولت افغانستان نےٹی ٹوینٹی عالمی کپ 2026 کے اپنے آخری گروپ میچ میں کناڈا کو یکطرفہ مقابلے کے بعد 82 رنز سے ہرا دیا۔ اگرچہ افغانستان سیمی فائنل کی دوڑ سے باہر ہو چکا تھا، لیکن اس بڑی جیت کے ساتھ انہوں نے ٹورنامنٹ کا باوقار اختتام کیا۔
ٹاس ہار کر پہلے بیٹنگ کرتے ہوئے افغانستان نے مقررہ 20 اوورز میں 200 رنز کا پہاڑ جیسا اسکور کھڑا کیا۔ اوپنر ابراہیم زدران نے صرف 56 گیندوں پر 7 چوکوں اور 5 چھکوں کی مدد سے 95 رنز کی ناقابل شکست اننگز کھیلی۔ وہ اپنی سنچری سے محض 5 رنز دور رہ گئے۔صدیق اللہ اٹل (44) اور ابراہیم کے درمیان تیسری وکٹ کے لیے 95 رنز کی اہم شراکت نے کناڈا کے بالرز کو بے بس کر دیا۔ جسکرن سنگھ کناڈا کے سب سے کامیاب بالر رہے، جنہوں نے 3 وکٹیں حاصل کیں۔
201 رنز کے بڑے ہدف کے تعاقب میں کناڈا کی ٹیم کبھی بھی مقابلے میں نظر نہیں آئی۔ کپتان دلپریت سنگھ (13) اور یوراج سامرا (17) کے جلد آؤٹ ہونے کے بعد وکٹیں گرنے کا سلسلہ رک نہ سکا۔ ہرش ٹھاکر نے 30 اور سعد بن ظفر نے 28 رنز بنا کر کچھ مزاحمت کی لیکن وہ کافی نہ تھی۔ تجربہ کار آل راؤنڈر محمد نبی نے شاندار بالنگ کرتے ہوئے 4 وکٹیں حاصل کیں اور کناڈا کی بیٹنگ لائن کی کمر توڑ دی، کپتان راشد خان نے بھی 2 کھلاڑیوں کو پویلین کی راہ دکھائی۔ جنوبی افریقہ کے خلاف قریبی ہار کے بعد اس بڑی جیت نے کھلاڑیوں کے مورال کو بلند کیا ہے۔ ابراہیم زدران کی فارم اور محمد نبی کا تجربہ آنے والے مقابلوں کے لیے افغانستان کے لیے مثبت پہلو ہیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔