ویسٹ انڈیز کے خلاف چار میچوں کی ٹی-ٹوئنٹی سیریز پاکستان کے نام

گیانا: ویسٹ انڈیز اور پاکستان دونوں کو ایک اور مایوس کن دن کا سامنا کرنا پڑا کیونکہ دونوں ٹیموں کے درمیان یہاں گزشتہ روز کھیلا گیا چوتھا اور آخری ٹی 20 میچ بھی تین اووروں کے بعد بارش کی نذر ہو گیا۔ بارش کے باعث میچ منسوخ ہونے کے ساتھ ہی چار میچوں کی سیریز صفر ایک سے پاکستان کے نام ہوگئی۔ سیریز کا دوسرا میچ واحد میچ تھا جو مکمل ہوا جس میں مہمان ٹیم پاکستان نے میزبان ٹیم کو سات رنوں سے شکست دے کر سیریز جیت لی۔ اس سے قبل افتتاحی میچ میں نو اور تیسرے میچ میں صرف 1.2 اوورز ہی کھیلے جا سکے تھے۔

قابل ذکربات یہ ہے کہ کرکٹ ویسٹ انڈیز اور پاکستان کرکٹ بورڈ نے بنیادی طور پر طے شدہ پانچ میچوں کی اس سیریز میں سے ایک میچ ختم کرنے کے لئے باہمی طور پر رضامندی ظاہر کی کیونکہ اس سے قبل کھیلی گئی ویسٹ انڈیز بمقابلہ آسٹریلیا ون ڈے سیریز کورونا کی وجہ سے متاثر ہوئی تھی۔ سیریز کے یہ چار میچ دونوں ٹیموں کے لیے انتہائی اہم تھے کیونکہ دونوں ٹیمیں رواں سال کے آخر میں ٹی 20 ورلڈ کپ کی جانب گامزن ہیں۔

چوتھے میچ میں بارش کے موسم کے پیش نظر میزبان ویسٹ انڈیز کی ٹیم نے ٹاس جیت کر بلے بازی کرنے کا فیصلہ کیا۔ سلامی بلے باز آندرے فلیچر نے پاکستان کے تجربہ کار اسپنر محمد حفیظ کے خلاف ابتدائی اوور میں 14 رن بنائے، جبکہ یونیورس باس کرس گیل نے محمد وسیم جونیئر کے خلاف اگلے اوور میں 12 رن بنائے۔ حسن علی نے تیسرے اوور میں چار رن دے کررن ریٹ کو کنٹرول کیا اور ان تین اووروں کے بعد بارش نے میچ متاثر کیا اور آخر میں حکام کو میچ رد کرنا پڑا۔