ہندوستانی جمہوریت کے لیے نئی امید

2024 کے لوک سبھا انتخابات ہندوستان کی جمہوری تاریخ میں ایک اہم موڑ ثابت ہوئے، کیونکہ ان انتخابات نے اپوزیشن کو بی جے پی کے غلبے کو چیلنج کرنے کی نئی امید دی۔ اگرچہ بی جے پی مسلسل تیسری بار حکومت بنانے میں کامیاب رہی لیکن وہ سادہ اکثریت بھی حاصل نہ کر سکی۔ اسے حکومت بنانے کے لیے تلگو دیشم پارٹی اور جنتا دل (یونائیٹڈ) جیسی علاقائی جماعتوں کے ساتھ شراکت داری کرنی پڑی۔ اپوزیشن کی کارکردگی نے ہندوستانی جمہوریت کے مستقبل کے لیے امیدیں پیدا کیں اور تقریباً ایک دہائی بعد سیاست کو ایک نئی سمت میں گامزن کیا۔

یہ نتائج اس وقت کے حالات کے تناظر میں اور بھی اہم ہیں۔ یہ انتخابات ایسے ماحول میں منعقد ہوئے جب ہندو قوم پرستی کے فروغ، اقتدار پسندانہ رجحانات کی مضبوطی اور حکمران جماعت کی جانب سے میڈیا اور مالی وسائل پر بے پناہ غلبے کے خلاف لڑائی جاری تھی۔ انتخابی کمیشن، جو بے بس نظر آ رہا تھا، نے حکمران جماعت کو کھلے عام انتخابی قوانین کی خلاف ورزی کی اجازت دے دی تھی۔ بی جے پی کو دیگر تمام جماعتوں کے مجموعی فنڈ سے تین گنا زیادہ فنڈنگ ملی، جس کا سہرا غیر شفاف انتخابی بانڈ سسٹم کو جاتا ہے، جسے بعد میں سپریم کورٹ نے غیر آئینی قرار دیا۔

ان تمام رکاوٹوں کے باوجود، عوام کے ووٹ سادہ اکثریت اور وزیر اعظم نریندر مودی کی نام نہاد ناقابل شکست حیثیت دونوں کے خلاف تھے۔ بی جے پی نے اپنی انتخابی مہم میں تقسیم کرنے والی سیاست کو جاری رکھا، مذہبی خوف اور تعصب کو ہوا دی اور نفرت انگیز بیانات دیے لیکن دلچسپ بات یہ ہے کہ جن حلقوں میں یہ نفرت انگیز مہم چلائی گئی، وہاں اکثر بی جے پی کو شکست کا سامنا کرنا پڑا۔ اس کی ایک اہم مثال اتر پردیش کے ایودھیا علاقے سے ملتی ہے، جہاں رام مندر کے افتتاح کے بعد بی جے پی کو بڑی کامیابی کی توقع تھی لیکن نتائج برعکس نکلے۔

اپوزیشن نے ان انتخابات میں بی جے پی کو چیلنج کرنے کے لیے عوامی مسائل پر توجہ دی۔ اقتصادی بدحالی، بے روزگاری، اور مہنگائی جیسے موضوعات کو نمایاں کیا گیا۔ اپوزیشن کا بیانیہ عوامی زندگی کو متاثر کرنے والے ٹھوس مسائل، جمہوری انحطاط اور بی جے پی کے ہندو قوم پرست بیانیے کے مقابلے میں سیکولر نظریے کو سامنے لانے پر مبنی تھا۔ اپوزیشن نے دلتوں، مسلمانوں اور دیگر پسماندہ طبقات کو شامل کر کے ایک جامع اتحاد بنانے کی کوشش کی۔

2024 کے عام انتخابات نے یہ ظاہر کیا کہ ہندوستانی عوام نے سیاسی توازن بحال کرنے کی کوشش کی ہے۔ یہ نہ صرف حکومت کی طاقت کو محدود کرنے بلکہ اپوزیشن کے کردار کو بحال کرنے کی ایک علامت ہے۔ تاہم، اپوزیشن کو کئی چیلنجز کا سامنا ہے۔ حکومت اب بھی اپنے اقتدار پسندانہ ایجنڈے کو آگے بڑھانے کے لیے سرگرم ہے اور اپوزیشن کو مستقبل میں سخت رکاوٹوں کا سامنا کرنا پڑے گا۔

اس کے باوجود، بی جے پی کی جانب سے مکمل اکثریت حاصل نہ کر سکنا اور اپوزیشن اتحاد کی کامیاب کارکردگی نے ہندوستانی سیاست میں ایک نیا باب کھول دیا ہے۔ یہ واضح ہو چکا ہے کہ دائیں بازو کی کامیابیاں دائمی نہیں ہیں اور اگر اپوزیشن متحد ہو تو وہ ان رجحانات کو چیلنج کر سکتی ہے۔

اپوزیشن کو اپنی حکمت عملی کو مزید مضبوط بنانے کی ضرورت ہے۔ انہیں جامع اور منصفانہ پالیسیوں کو فروغ دینا ہوگا جو انسانی حقوق، بنیادی اقتصادی حقوق اور اقلیتوں کے تحفظ کو یقینی بنائیں۔ اس کے ساتھ ساتھ پسماندہ طبقات کے لیے مثبت اقدامات کو ترجیح دینی ہوگی۔ یہی وہ راستہ ہے جو نہ صرف ہندوستانی جمہوریت کے معیار کو بلند کرے گا بلکہ کانگریس کی قیادت والے اتحاد کی انتخابی کامیابیوں کے امکانات کو بھی بہتر بنائے گا۔

(مضمون نگار زویا حسن، جواہر لال نہرو یونیورسٹی کے سینٹر فار پولیٹیکل اسٹڈیز میں پروفیسر ہیں)