اگر ہندوستان اتنا پسند ہے تو عمران وہاں منتقل ہو جائیں: مریم نواز

اگر عمران خان کی رخصتی عدم اعتماد کی تحریک کی کامیابی کی وجہ سے ہوتی ہے تو پاکستان کی تاریخ میں یہ پہلی مرتبہ ہوگا جب کوئی حکومت تحریک عدم اعتماد کی وجہ سے اقتدار سے بے دخل ہوگی۔

مریم نواز، تصویر آئی اے این ایس
مریم نواز، تصویر آئی اے این ایس
user

سید خرم رضا

پاکستان میں سیاسی پارہ آسمان چھو رہا ہے جس کی وجہ سے وہاں کی سیاست میں گرمی بڑھ گئی ہے۔ سپریم کورٹ کے فیصلے کے بعد وزیر اعظم عمران خان کو یہ یقین ہو چلا ہے کہ ان کی حکومت کے جانے کا وقت آ گیا ہے۔ یہ دیکھتے ہوئے انہوں نے بیرونی مداخلت کا سیاسی داؤ چل دیا ہے۔

عمران خان نے کل شام قوم سے خطاب میں کہا کہ ان کی حکومت کو ہٹانے کی سازش امریکہ کے ذریعہ کی گئی کیونکہ انہوں نے حال ہی میں روس کا دورہ کیا تھا۔ انہوں نے کہا کہ ان کے ہٹائے جانے کے بعد جو حکومت پاکستان میں قائم ہوگی وہ ’امپورٹیڈ حکومت‘ ہوگی۔ قوم سے اپنے خطاب میں انہوں نے ہندوستان کی تعریف کرتے ہوئے کہا کہ کیا کوئی بیرونی حکومت ہندوستان کی حکومت ہٹا سکتی ہے۔ انہوں نے کہا کہ ہندوستان ایک خوددار ملک ہے اور وہ پاکستان کو بھی ایسا ہی خوددار ملک بنانا چاہتے ہیں۔


نواز شریف کی صاحبزادی مریم نواز شریف نے عمران خان کی جانب سے ہندوستان کی تعریف کرنے کے بعد انہیں ’خوددار قوم‘ کہہ کر تنقید کا نشانہ بنایا ہے۔ وہ کہتی ہیں ’’کوئی ایسے شخص کو بتائے جو اپنی طاقت کو جاتا دیکھ کر دماغی توازن کھو رہا ہے اور اسے اس کی اپنی پارٹی نے نکالا ہے کسی اور نے نہیں۔ اگر انہیں ہندوستان اتنا پسند ہے تو وہاں منتقل ہو جائیں اور پاکستان چھوڑ دیں۔‘‘

واضح رہے اگر عمران خان کی رخصتی عدم اعتماد کی تحریک کی کامیابی کی وجہ سے ہوتی ہے تو پاکستان کی تاریخ میں یہ پہلی مرتبہ ہوگا جب کوئی حکومت تحریک عدم اعتماد کی وجہ سے اقتدار سے بے دخل ہوگی۔ آج تحریک عدم اعتماد پر ووٹنگ ہونی ہے اور اگر وہ ہوتی ہے تو اس کے نتائج پر سب کی نظر رہے گی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔