چاندی نے رقم کی تاریخ، قیمت پہلی بار 3 لاکھ روپے فی کلو سے متجاوز

کموڈیٹی بازار میں پیر 19 جنوری 2026 کو چاندی کی قیمتوں نے ایک نیا سنگِ میل عبور کرتے ہوئے تاریخ رقم کر دی۔ گھریلو و عالمی منڈیوں میں مضبوط رجحان کے باعث چاندی پہلی بار 3 لاکھ روپے فی کلوگرام سے اوپر پہنچ گئی۔ سرمایہ کاری کی بڑھتی ہوئی طلب، صنعتی شعبے کی مضبوط ضرورت اور بین الاقوامی سطح پر مثبت اشاروں نے اس تیزی کو مزید طاقت دی ہے۔

ملٹی کموڈٹی ایکسچینج میں مارچ ڈیلیوری والی چاندی کے وعدہ سودوں میں زبردست خریداری دیکھنے کو ملی۔ کاروبار کے دوران چاندی کی قیمت میں 13 ہزار 553 روپے کا اضافہ ہوا، جو تقریباً ساڑھے چار فیصد بنتا ہے، اور یوں یہ 3 لاکھ 1 ہزار 315 روپے فی کلوگرام کی تاریخی سطح تک جا پہنچی۔ یہ پہلا موقع ہے جب گھریلو وعدہ بازار میں چاندی نے تین لاکھ روپے فی کلو کی حد پار کی ہے، جسے بازار کے لیے ایک غیر معمولی پیش رفت قرار دیا جا رہا ہے۔

بین الاقوامی منڈی میں بھی چاندی کی قیمتوں نے نیا ریکارڈ بنایا۔ عالمی سطح پر مارچ ڈیلیوری والی چاندی کے سودے میں نمایاں اضافہ دیکھا گیا اور قیمت 94 امریکی ڈالر فی اونس سے تجاوز کر گئی۔ عالمی بازار میں آنے والی اس مضبوطی کا براہِ راست اثر ہندوستانی منڈی پر بھی پڑا، جہاں قیمتیں تیزی سے اوپر گئیں۔

ماہرین کے مطابق چاندی کی قیمتوں کو بیک وقت کئی عوامل سے سہارا مل رہا ہے۔ الیکٹرانکس اور گرین انرجی جیسے شعبوں میں صنعتی استعمال بڑھنے سے چاندی کی مانگ میں اضافہ ہوا ہے۔ اس کے ساتھ ساتھ امریکی ڈالر کی کمزوری نے بھی قیمتی دھاتوں کو تقویت دی، جس کا فائدہ چاندی اور سونے دونوں کو ملا۔ یہی وجہ ہے کہ حالیہ سیشنز میں چاندی نے سونے کے مقابلے میں نسبتاً بہتر کارکردگی دکھائی ہے۔

سال 2025 چاندی کے لیے غیر معمولی ثابت ہوا، جب اس کی قیمتوں میں ریکارڈ اضافہ دیکھنے کو ملا، اور یہ رجحان 2026 میں بھی جاری ہے۔ نئے سال کے صرف انیس دنوں میں ہی چاندی کی قیمت میں پینسٹھ ہزار روپے سے زیادہ کا اضافہ ہو چکا ہے۔ دسمبر 2025 کے اختتام پر چاندی کا بھاؤ تقریباً دو لاکھ پینتیس ہزار روپے فی کلو تھا، جو اب بڑھ کر تین لاکھ سے اوپر پہنچ گیا ہے۔

چاندی کے ساتھ ساتھ سونے کی قیمتوں میں بھی مسلسل تیزی دیکھی جا رہی ہے، جس سے قیمتی دھاتوں کی مجموعی مارکیٹ میں جوش و خروش کا ماحول بنا ہوا ہے۔ بڑھتی قیمتوں کے درمیان ہندوستان کی چاندی پر بڑھتی ہوئی انحصار بھی موضوعِ بحث ہے، کیونکہ عالمی سپلائی میں کسی بھی طرح کی رکاوٹ مستقبل میں قیمتوں پر مزید اثر ڈال سکتی ہے۔