ملکی و عالمی مارکیٹ میں سونے اور چاندی کی قیمتوں میں نمایاں اضافہ

نئی دہلی: ملک بھر میں سونے اور چاندی کی قیمتوں میں اضافہ جاری ہے۔ سونے اور چاندی کی قیمتوں میں آج 29 نومبر کو نمایاں تیزی دیکھی گئی۔ اگر آپ ان دھاتوں کی خریداری کا ارادہ رکھتے ہیں، تو تازہ ترین قیمتوں سے آگاہی ضروری ہے۔

رپورٹ کے مطابق، ملٹی کموڈٹی ایکسچینج (ایم سی ایکس) پر آج سونے کی قیمت میں ایک فیصد اضافہ ہوا۔ سونا 76504 روپے فی 10 گرام (تولہ) تک پہنچ گیا، جو کل 75724 روپے پر بند ہوا تھا۔ دوپہر کو سونا 625 روپے اضافے کے ساتھ 76349 روپے فی 10 گرام پر تجارت کر رہا تھا۔

چاندی کی قیمتوں میں بھی زبردست اضافہ دیکھا گیا۔ چاندی کا دسمبر فیوچر 3400 روپے اضافے کے بعد 91487 روپے فی کلو تک پہنچ گیا۔ تاہم، دن کے اختتام پر یہ 89000 روپے کے قریب رہی۔ وہیں، دہلی میں 24 قیراط سونے کی قیمت 77513 روپے فی 10 گرام اور چاندی کی قیمت 92500 روپے فی کلو رہی۔

عالمی مارکیٹ میں بھی سونے اور چاندی کی قیمتوں میں اضافہ ہوا۔ اسپاٹ گولڈ 0.7 فیصد اضافے کے ساتھ 2660.03 ڈالر فی اونس جبکہ اسپاٹ سلور 1.1 فیصد بڑھ کر 30.58 ڈالر فی اونس تک پہنچ گیا۔

قیمتوں میں اضافے کی وجوہات:

سونے اور چاندی کی قیمتوں میں اضافے کی چند اہم وجوہات ہیں۔ سب سے پہلی وجہ ڈالر کی کمزوری ہے، جس کی وجہ سے دونوں دھاتوں کی قیمتیں بڑھ رہی ہیں۔ ڈالر انڈیکس 106 کے نیچے آ گیا ہے، جس سے عالمی اور ملکی سطح پر سونے اور چاندی کی قیمتوں میں تیزی آئی۔ دوسری جانب، امریکی فیڈرل ریزرو کی جانب سے شرح سود میں کمی کی توقعات بھی قیمتوں میں اضافے کا سبب بنی ہیں۔ اس کے علاوہ، روس اور یوکرین کے درمیان بڑھتے ہوئے تناؤ اور اسرائیل-لبنان تنازعے نے سونے کو محفوظ سرمایہ کاری کے طور پر مزید مقبول بنا دیا ہے، جس کی وجہ سے ان دھاتوں کی قیمتوں میں اضافہ ہوا۔