سیف علی خان پر چاقو سے حملہ، گلے پر زخم، لیلاوتی اسپتال میں داخل

ممبئی: مشہور بالی وڈ اداکار سیف علی خان اپنے گھر میں چوری کی واردات کے دوران قاتلانہ حملے میں شدید زخمی ہو گئے۔ باندرہ پولیس کے مطابق، رات تقریباً دو بجے ایک نامعلوم چور سیف علی خان کے گھر میں گھس آیا، جب اداکار اپنے گھر میں دیگر اہل خانہ کے ساتھ سو رہے تھے۔ چور اور سیف کے گھریلو ملازمین میں ہاتھا پائی شروع ہو گئی۔

جب سیف علی خان نے صورتحال کو سنبھالنے کی کوشش کی تو چور نے ان پر تیز دھار ہتھیار سے حملہ کر دیا۔ اس حملے میں سیف کے گلے پر 10 سینٹی میٹر گہرا زخم آیا۔ انہیں ہاتھ اور پیٹھ پر بھی شدید چوٹیں آئیں اور ان کی پیٹھ میں ایک نوک دار چیز گھسی ہوئی تھی جسے لیلاوتی اسپتال میں فوری سرجری کے ذریعے نکالا گیا۔

پولیس کے ذرائع کے مطابق، حملہ آور موقع سے فرار ہونے میں کامیاب ہو گیا۔ باندرہ پولیس اسٹیشن میں نامعلوم شخص کے خلاف ایف آئی آر درج کر لی گئی ہے اور واقعے کی تحقیقات شروع کر دی گئی ہیں۔ اس واقعے کے بعد سیف علی خان کو لیلاوتی اسپتال میں داخل کیا گیا جہاں ان کی حالت خطرے سے باہر بتائی جا رہی ہے۔ فلمی دنیا کی کئی مشہور شخصیات نے ان کی جلد صحت یابی کے لیے نیک خواہشات کا اظہار کیا ہے۔

ایک سینئر آئی پی ایس افسر نے واقعے کی تصدیق کی اور کہا "سيف علی خان کو لِلوتی اسپتال میں داخل کیا گیا ہے، جہاں ان کا علاج جاری ہے۔ یہ ابھی تک واضح نہیں ہے کہ انہیں چور سے لڑائی میں چاقو مارا گیا ہے یا زخمی ہوئے ہیں۔ ہم اس معاملے کی تحقیقات کر رہے ہیں۔ ممبئی کرائم برانچ بھی اس واقعے کی متوازی تحقیقات کر رہی ہے۔"

سيف اور کرینہ، جو 2012 سے شادی شدہ ہیں، ممبئی کے باندرا ویسٹ میں ستگرو شرن عمارت میں رہتے ہیں۔ جوڑے کے دو بیٹے - تیمور (8) اور جہ (4) بھی ان کے ساتھ رہتے ہیں۔