دھوکہ دہی معاملہ: راج کُندرا کا انکشاف، ’نوٹ بندی سے برباد ہوا کاروبار، قرض میں ڈوبا خاندان‘

ممبئی: اداکارہ شلپا شیٹی کے شوہر اور صنعت کار راج کندرا نے 60 کروڑ روپے کی مبینہ مالی دھوکہ دہی کے معاملے میں ممبئی پولیس کی اقتصادی جرائم شاخ (ای او ڈبلیو) کے سامنے اہم انکشافات کیے ہیں۔ کندرا نے بیان میں کہا کہ نوٹ بندی کے فیصلے نے ان کے کاروبار کو بری طرح متاثر کیا، جس کے نتیجے میں وہ بھاری قرض میں ڈوب گئے۔

ممبئی پولیس نے جمعے کو جاری بیان میں بتایا کہ ای او ڈبلیو کی ٹیم نے راج کندرا سے کئی گھنٹوں تک پوچھ تاچھ کی، جس دوران انہوں نے اعتراف کیا کہ نوٹ بندی کے بعد ان کی کمپنی، جو الیکٹریکل اور گھریلو آلات کے کاروبار سے منسلک تھی، شدید مالی بحران کا شکار ہوگئی۔ اس نقصان کے باعث وہ تقریباً 60 کروڑ روپے کی رقم واپس چکانے میں ناکام رہے۔

پولیس ذرائع کے مطابق، راج کندرا سے یہ دوسری مرتبہ پوچھ تاچھ کی گئی ہے اور انہیں آئندہ ہفتوں میں دوبارہ طلب کیا جائے گا تاکہ کیس کے دیگر مالی گوشوں کو بھی واضح کیا جا سکے۔ تحقیقات کرنے والے افسران کا کہنا ہے کہ معاملے میں متعدد کاروباری شراکت داروں اور فنکاروں کے بیانات بھی قلم بند کیے جا رہے ہیں۔

اس سے قبل ممبئی کی سیشن عدالت نے کیس کی سماعت کے دوران سخت تبصرہ کرتے ہوئے کہا تھا کہ شلپا شیٹی کو ملک چھوڑنے کی اجازت تبھی دی جا سکتی ہے جب وہ دھوکہ دہی میں ملوث رقم واپس کریں۔ شلپا کے وکیل نے عدالت سے کولمبو جانے کی اجازت مانگی تھی، جس پر عدالت نے طنزیہ انداز میں پوچھا کہ ’’کیا دعوت نامہ آ چکا ہے؟‘‘ وکیل نے جواب دیا کہ اجازت ملنے کے بعد ہی دعوت نامہ موصول ہوگا۔ عدالت نے دو ٹوک الفاظ میں کہا کہ 60 کروڑ روپے کی رقم کی واپسی کے بعد ہی اس معاملے پر غور کیا جائے گا۔ اگلی سماعت 14 اکتوبر کو مقرر ہے۔

راج کندرا نے دورانِ پوچھ تاچھ یہ بھی بتایا کہ انہوں نے کاروباری لین دین کے تحت اداکاراؤں بپاشا باسو، نیہا دھوپیا اور پروڈیوسر ایکتا کپور کو پیشہ ورانہ بنیاد پر کچھ رقم ادا کی تھی۔ ان لین دین کی تفصیلات اب پولیس کی تفتیش کا حصہ ہیں۔

اسی دوران، شلپا شیٹی اور راج کندرا نے کروا چوتھ کے موقع پر سوشل میڈیا پر اپنی جھلکیاں بھی شیئر کی ہیں۔ شلپا نے ہاتھوں اور پیروں پر لگی مہندی کی تصاویر پوسٹ کیں جن میں کنول کے پھولوں کا خوبصورت ڈیزائن نظر آ رہا ہے۔ ایک اور ویڈیو میں انہوں نے اپنی ’’سرگی‘‘ دکھائی، جس میں کھجور، میٹھائیاں اور دیگر پکوان شامل تھے۔ روایت کے مطابق پنجاب میں گھر کی بڑی عورت صبح برہم مہیورت میں سرگی دیتی ہے۔

اگرچہ سوشل میڈیا پر ان کی یہ تصویریں تیزی سے وائرل ہو رہی ہیں، لیکن دوسری جانب پولیس کی تفتیش نے ان کی مشکلات میں اضافہ کر دیا ہے۔ ممبئی پولیس کے مطابق، کیس کے تمام مالی پہلوؤں کی جانچ کے بعد ہی کسی نتیجے پر پہنچا جا سکے گا۔