کورونا وائرس کے خلاف جنگ میں لوگوں کی مدد کے لیے آگے آئے ریتک روشن اور کپِل شرما

ممبئی: بالی وڈ کے ماچو مین ریتک روشن اور کامیڈین کپِل شرما کورونا وائرس کی جنگ میں لوگوں کی مدد کرنے کے لیے آگے آئے ہیں۔ ملک میں 21 دن کے لاک ڈاؤن کے اعلان کے وقت وزیر اعظم نریندر مودی نے اعلان کیا تھا کہ اس وبا کے وقت گھر میں رہنے کے ساتھ ساتھ ضرورت مندوں کی مدد کریں جس سے لوگوں کو دقت نہ ہو۔ اس وائرس کے پھیلنے سے کئی غریب اور بے بس لوگ پریشان ہیں۔

اس وبا کے خلاف جنگ میں بالی ووڈ کے ستارے بھی اپنا تعاون دے رہے ہیں اور امدادی کاموں میں پیش پیش نظر آ رہے میں۔ امداد کرنے والے ستاروں میں ریتک روشن اور کپِل شرما کا نام بھی جڑ گیا ہے۔

ریتک روشن نے برهن ممبئی میونسپل کارپوریشن (بی ایم سی) کو 20 لاکھ روپے عطیہ دیا ہے۔ ریتک روشن نے ٹویٹ کرتے ہوئے مہاراشٹر حکومت کا شکریہ بھی ادا کیا۔ انہوں نے لکھا، ’’مہاراشٹر حکومت کو میرا شکریہ، جنہوں نے مجھے خدمت کا یہ موقع دیا ہے۔ یہ ہماری ذمہ داری ہے کہ ہم اپنی صلاحیت کے مطابق مدد کے لئے آگے آئیں۔‘‘

اسٹار کامیڈین کپَل شرما نے وزیر اعظم ریلیف فنڈ میں 50 لاکھ روپے کا عطیہ کیا۔ شرما نے ڈونیشن کی معلومات کا ٹویٹ کرتے ہوئے لکھا، ’’یہ وقت ساتھ میں کھڑے ہونے کا ہے۔ پی ایم ریلیف فنڈ میں 50 لاکھ ڈونیٹ کر رہا ہوں۔ سب سے درخواست ہے کہ گھر پر رہیں، محفوظ رہیں۔‘‘