فادرس ڈے: بالی ووڈ کی فلموں میں والد کا کردار

بالی ووڈ کے فلم سازوں نے اپنی فلموں میں باپ کے کردار کو متاثر کن طریقے سے کم ہی پیش کیا ہو لیکن جب جب باپ کا کردار پردہ سیمیں پر نظر آیا ہے تو ناظرین نے اسے بے حد پسند کیا ہے۔

علامتی تصویر
علامتی تصویر
user

یو این آئی

بالی ووڈ کی فلموں میں سپر اسٹار امیتابھ بچن باپ کے کردار کو متاثر کن طریقے سے ادا کرنے میں مہارت حاصل رکھتے ہیں۔ باپ کے متاثرکن کردار والی ان کی فلموں میں روی چوپڑا کی ہدایت میں بننے والی فلم ’’باغبان‘‘ خاص طور پر قابل ذکر ہے۔ اس کے علاوہ ایسے کردار والی ان کی فلموں میں اندرجیت، کبھی خوشی کبھی غم، محبتیں، کبھی الوداع نہ کہنا، سرکار، ایک رشتہ دی بانڈ آف لو، وقت، سرکار راج اور فیملی جیسی فلمیں شامل ہیں۔

فلموں کی تاریخ کو اگر دیکھا جائے تو پتہ چلتا ہے کہ سال 1951 میں ریلیز ہونے والی فلم آوارہ میں پرتھوی راج کپور نے والد کا اثرانگیز کردار ادا کیا تھا۔ انہوں نے حقیقی زندگی کی طرح ہی اس فلم میں بھی راج کپور کے والد کا کردار ادا کیا تھا۔ فلم آوارہ میں ان دونوں تجربہ کار فنکاروں نے اپنے اداکاری سے ناظرین کے دل جیت لئے تھے۔


پرتھوی راج نے مغل اعظم میں بھی اکبر کے رول میں باپ کا کردار کیا تھا۔ اس فلم میں وہ شہنشاہ جذبات دلیپ کمار کے والد بنے تھے۔ اس کے علاوہ سال 1971 میں ریلیز ہونے والی فلم کل آج اور کل میں انہوں نے ایک بار پھر راج کپور کے والد کا کردار ادا کیا تھا۔

سال 1982 میں ریلیز ہونے والی فلم شکتی میں دلیپ کمار نے باپ کے کردار کو موثر طریقے سے پردہ سیمیں پر پیش کیا تھا۔ اس فلم میں انہوں نے امیتابھ بچن کے والد کا کردار ادا کیا تھا جو فرض کی خاطر اپنے بیٹے کو گولی مارنے سے بھی نہیں گریز کرتے۔ اسی طرح سال 1983 میں آئی فلم معصوم میں نصرالدین شاہ نے جگل ہنس راج کے باپ کا متاثرکن کرادار ادا کیا تھا۔


بالی وڈ کے ’’ہی مین‘‘ کے نام سے مشہور دھرمیندر نے کئی فلموں میں باپ کا مؤثر کردار ادا کیا ہے۔ ان میں سنی، سلطنت، اپنے، یملا پگلا دیوانہ جیسی بہترین فلمیں شامل ہیں۔ ان فلموں میں وہ سنی دیول کے باپ کے کردار میں نظر آئے تھے۔ مشہور اداکار راجندر کمار نے لواسٹوری میں کمار گورو کے باپ کا کردار ادا کیا تھا۔ وہیں سنیل دت نے بھی کئی مشہور فلموں میں باپ کا کردار ادا کیا تھا جن میں راکی، چھتریہ، درد کا رشتہ، منا بھائی ایم بی بی ایس جیسی مشہور فلمیں شامل ہیں۔

موجودہ دور میں آلوک ناتھ باپ کے بااثر کردار کو نبھانے میں معروف ہیں۔ انہوں نے میں نے پیار کیا، وواہ، ایک وواہ ایسا بھی، کبھی خوشی کبھی غم، ہم آپ کے ہیں کون جیسی بہترین فلموں میں باپ کا اثرانگیز کردار ادا کیا۔ اس کے علاوہ اشوک کمار، ناصر حسین، اوم پرکاش، اتپل دت، قادر خان، پریش راول اور انوپم کھیر جیسے مشہور اداکاروں نے بھی کئی فلموں میں باپ کے کردار کو پردہ سیمیں پر بخوبی پیش کیا ہے۔


وقت وقت پر بالی ووڈ کی کئی فلموں میں باپ کے متاثر کن کردار والی فلمیں ریلیز ہوتی رہی ہیں۔ ان میں عامر خان کی اکیلے ہم اکیلے تم، سنجے دت کی پتا، بلراج ساہنی کی وقت، راجیش کھنہ کی اوتار، پران کی شرابی اور صنم بے وفا، انوپم کھیر اور امریش پوری کی دلوالے دلهنيا لے جائیں گے، سنجیو کمار کی کوشش، ہم آپ ہیں کون، کیا کہنا، ڈیڈی، انل کپور کی رشتے، ابھیشیک بچن کی پا وغیرہ شامل ہیں۔ واضح رہے کہ یوم والد امریکہ سمیت دنیا کے بیشتر ممالک میں ہر سال جون کے تیسرے اتوار کو فادرس ڈے کے طور پر منایا جاتا ہے۔ اگرچہ کچھ ممالک میں یہ جون کی مختلف تاریخوں کو منایا جاتا ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔