دشا پٹانی کے گھر فائرنگ کا معاملہ، پولیس نے دو نابالغوں کو حراست میں لیا، دو ملزمان کا انکاؤنٹر

نئی دہلی: بالی ووڈ اداکارہ دشا پٹانی کے گھر فائرنگ کے واقعے میں دہلی پولیس کی کاؤنٹر انٹیلی جنس نے دو نابالغ ملزمان کو حراست میں لیا ہے۔ قبل ازیں، ہی دو شوٹر پولیس مقابلہ کے دوران ہلاک ہو گئے تھے۔ ملزمان کے گرفتار ہونے کی اطلاع ایسے وقت میں سامنے آئی ہے جب دہلی، ہریانہ اور اتر پردیش پولیس کی مشترکہ ٹیم نے ان کی شناخت اور تعاقب کے بعد کارروائی کی۔ اطلاعات کے مطابق، حراست میں لیے گئے دونوں ملزمان اس واقعے میں شریک تھے جو 12 ستمبر کی صبح پیش آیا۔

واقعہ کے وقت، بریلی کے سیول لائنز علاقے میں دشا پٹانی کے گھر صبح تقریباً 3 بج کر 45 منٹ پر فائرنگ ہوئی۔ اس دوران اداکارہ کے والد، ریٹائرڈ سی او جگدیش سنگھ پٹانی، والدہ اور بڑی بہن خوشبو گھر میں موجود تھیں۔ کسی جانی نقصان کی اطلاع نہیں ملی، تاہم علاقے میں خوف و ہراس پھیل گیا۔

ابتدائی تحقیقات سے یہ معلوم ہوا کہ فائرنگ کا الزام گولڈی برار گینگ پر تھا، جس نے سوشل میڈیا پوسٹ کے ذریعے ذمہ داری قبول کی۔ پولیس نے اس حوالے سے متعدد ثبوت اور اسکرین شاٹس حاصل کیے۔

مزید تحقیقات کے بعد، اتر پردیش ایس ٹی ایف کی نوئیڈا ٹیم، ہریانہ پولیس اور دہلی پولیس کی مشترکہ ٹیم نے دونوں مشتبہ ملزمان کا غازی آباد میں پتہ لگا کر انہیں حراست میں لینے کی کوشش کی۔ پولیس کی رپورٹ کے مطابق، جب ٹیم نے ملزمان کو روکنے کی کوشش کی تو انہوں نے پولیس پر فائرنگ کی، جس کے جواب میں پولیس نے کارروائی کی۔ اس کے نتیجے میں دونوں ملزمان شدید زخمی ہوئے اور انہیں فوری طور پر ہسپتال منتقل کیا گیا، جہاں بعد ازاں انہیں مردہ قرار دیا گیا۔

ابتدائی اطلاعات کے مطابق، دونوں ہلاک شدگان کا گولڈی برار گینگ سے تعلق تھا اور گرفتار ہونے والے ملزمان کے حوالے سے پولیس کو فائرنگ کیس میں اہم سراغ ملنے کی توقع ہے۔ پولیس اب مزید تحقیقات کر رہی ہے کہ آیا اس واقعے میں دیگر افراد بھی ملوث تھے یا نہیں۔

پولیس حکام کے مطابق، اس کارروائی سے نہ صرف دشا پٹانی اور ان کے اہل خانہ کی حفاظت کو یقینی بنایا گیا بلکہ دیگر ممکنہ خطرات کو بھی کم کیا گیا۔ دہلی پولیس کی جانب سے اس قسم کے سنگین جرائم کے خلاف سخت اقدامات کی یقین دہانی کرائی گئی ہے۔