بی جے پی رکن پارلیمنٹ ہیما مالنی نے کسانوں سے کی خصوصی اپیل

کورونا وائرس کے بڑھتے انفیکشن کے درمیان مشہور فلم اداکارہ اور متھرا سے رکن پارلیمنٹ ہیما مالنی نے برج علاقہ کے کسانوں سے اپیل کی ہے کہ وہ صحیح وقت پر اور صحیح جگہ پر کووڈ کا ٹیکہ ضرور لگوائیں تاکہ وہ خود کو، اپنی فیملی کو اور ملک کو کورونا وائرس جیسی وبا سے بچا سکیں۔

ہیما مالنی نے پیر کے روز اپنے علاقائی نمائندہ جناردن شرما کے ذریعہ سے جاری ویڈیو پیغام میں کہا کہ ’’میں آپ کی ہیما مالنی متھرا-ورنداون اور برج کے سبھی گاؤوں میں رہنے والے دن رات کھیتوں میں پسینہ بہانے والے کسان بہن-بھائیوں سے درخواست کرنا چاہتی ہوں کہ وہ کورونا وبا کی اس دوسری لہر کا صبر کے ساتھ مقابلہ کریں۔‘‘ انھوں نے مزید کہا کہ ’’کورونا وائرس انفیکشن سے بچاؤ کے لیے ٹیکہ کاری پروگرام میں حصہ ضرور لیجیے۔ ٹیکہ ضررو لگوائیے۔ یہ دیکھا گیا ہے کہ جن لوگوں نے ٹیکہ لگوایا ہے، ان پر کورونا کا سنگین اثر نہیں ہوا ہے۔ میں نے بھی اس کی دونوں خوراک لے لی ہیں۔ آپ بھی جلد از جلد رجسٹریشن کروائیے۔‘‘

ہیما مالنی نے اپنی بات کو آگے بڑھاتے ہوئے یہ بھی کہا کہ ’’دن رات کھیتوں میں پسینہ بہانے والے کسان بھائیوں سے اپیل کرتی ہوں کہ اگر اس بیماری سے بچاؤ چاہتے ہیں تو ٹیکہ ضرور لگوائیے۔ ٹیکہ لگواؤ گے، تو اپنے آپ کو، فیملی کو اور ملک کو بھی بچاؤ گے۔ کورونا کو ہرانا ہے، ٹیکہ ضرور لگوانا ہے۔‘‘