سعودی عرب حج سیزن کے انتظام میں کامیاب رہا: یورپی یونین

سعودی عرب: یورپی یونین کے سرکاری ترجمان برائے مشرق وسطی و شمالی افریقا لوئس میگل نے العربیہ ڈاٹ نیٹ سے گفتگو کرتے ہوئے کہا کہ "مجھے اس بات پر مسرت ہو رہی ہے کہ رواں سال حج سیزن کے شان دار انتظام پر سعودی حکام کو سلام پیش کروں۔ اس موقع پر بہترین حفاظتی تدابیر اور احتیاطی اقدامات کیے گئے تھے جن کے سبب حجاج کرام میں کورونا وائرس کا کوئی کیس ریکارڈ نہیں ہوا۔"

انہوں نے حج سیزن میں سیکورٹی ذمے داریوں کی انجام دہی میں خواتین کی عملی شرکت کو بھی سراہا۔ یورپی یونین کے ترجمان نے G20 کے زیر سایہ سعودی عرب کے کردار اور ویکسی نیشن کے بین الاقوامی اتحاد کے لیے مملکت کے سپورٹ کی بھی ستائش کی۔

یاد رہے کہ سعودی وزیر صحت ڈاکٹر توفیق الربیعہ نے رواں سال 1442 ہجری کے لیے حج کے طبی منصوبے کی کامیابی کا اعلان کیا تھا۔ ان کا کہنا تھا کہ حج سیزن کورونا وائرس اور دیگر وبائی امراض سے محفوظ رہا۔