دنیا بھر سے 11 لاکھ عازمین فریضہ حج کی ادائی کے لیے سعودی عرب پہنچے

دنیا بھر سے کم وبیش 11لاکھ عازمین فریضہ حج کی ادائی کے لیےسعودی عرب پہنچ گئے ہیں۔ ان میں زیادہ تعداد انڈونیشیا سے تعلق رکھنے والے حجاج کی ہے۔ ان کے بعد بالترتیب ہندوستان، پاکستان اور بنگلہ دیش سے تعلق رکھنے والے حجاج کرام ہیں۔

اس وقت لاکھوں حاجی مکہ مکرمہ میں موجود ہیں۔ وہ عمرے کی ادائی، طواف بیت اللہ اور دوسری عبادات میں مصروف ہیں۔ ایک بڑی تعداد مدینہ منورہ میں روضہ رسولﷺ کی زیارت کا شرف حاصل کر رہی ہے اور مسجد نبوی صلی اللہ علیہ وسلم میں عبادت و ریاضت میں مصروف ہے۔

سعودی حکومت کے مقرر کردہ حج کوٹا کے مطابق انڈونیشیا سے ڈھائی لاکھ اور ہندوستان اور پاکستان سے دو-دو لاکھ عازمین حج کے لیے پہنچیں گے۔ ہندوستان سے سوموار تک ایک لاکھ 36 ہزار جبکہ پاکستان سے ایک لاکھ 35 ہزارعازمینِ حج سعودی عرب میں پہنچ گئے ہیں۔

جدہ میں واقعہ ہندوستانی قونصل نے ہندوستانی حج مشن کے حوالہ سے اطلاع دی ہے کہ ایک لاکھ نو ہزار آٹھ سو تیرہ حجاج حج کمیٹی آف انڈیا کی جانب سے جبکہ چھبیس ہزار چھ سو پچاسی حجاج حکومت ہند کی جانب سے مکہ مکرمہ اور مدینہ منورہ پہنچے ہیں۔

ادھر، مکہ مکرمہ میں پاکستان حج مشن کے فراہم کردہ اعداد وشمار کے مطابق ان میں چھیانوے ہزارعازمین سرکاری حج اسکیم اور چھتیس ہزارنجی حج اسکیم کے تحت مکہ مکرمہ اور مدینہ منورہ میں پہنچے ہیں۔ ان حجاج کو 409 پروازیں لے کر سعودی عرب پہنچی ہیں۔

انھوں نے بتایا کہ پچاس ہزار عازمین مدینہ منورہ کی زیارت کے بعد مکہ مکرمہ پہنچ چکے ہیں۔ ان میں زیادہ ترعازمین پہلے سیدھے مدینہ منورہ پہنچے تھے۔ وہاں انھوں نے آٹھ یا نو روز تک قیام کیا ہے۔ سرکاری حج اسکیم کے تحت آنے والے آٹھ ہزار سے زیادہ عازمین حج ابھی مدینہ منورہ میں موجود ہیں اور اٹھاسی ہزار مکہ مکرمہ میں پہنچ چکے ہیں۔