حج 2025: حجاج کرام عرفات میں شام 4 بجے تک اپنے خیموں میں رہیں، وزارت حج نے گرمی کے پیش نظر کی تاکید

حج 2025 کے لیے حجاج کرام سعودی عرب میں مناسک ادا کر رہے ہیں۔ شدید گرمی کے پیش نظر سعودی عرب کی وزارت حج و عمرہ نے کئی طرح کی تیاریاں کی ہیں اور ضروری ہدایات بھی وقت وقت پر جاری کی جا رہی ہیں۔ اس درمیان وزارتِ حج و عمرہ نے حجاج کرام سے اپیل کی ہے کہ وہ میدانِ عرفات میں قیام کے دوران صبح 10 بجے سے سہ پہر 4 بجے تک اپنے خیموں میں ہی موجود رہیں۔ یہ ہدایت حجاج کی سلامتی اور صحت کے تحفظ کو یقینی بنانے کے لیے جاری کی گئی ہے۔

وزارت صحت نے اس امر پر زور دیا ہے کہ حجاج باقاعدہ طور پر منظور شدہ گروپ کے نظام کی پابندی کریں، نقل و حرکت کے لیے متعین کردہ اوقات اور شیڈول کی مکمل پاسداری کریں ، صرف سرکاری ذرائع نقل و حمل، جیسے بسوں اور مشاعر ٹرین، ہی استعمال کریں۔ حجاج کرام کو پیدل چلنے سے منع کیا گیا ہے کیونکہ یہ عمل نہ صرف حجاج کی سلامتی کے لیے خطرہ بن سکتا ہے بلکہ ٹریفک کے بہاؤ میں بھی رخنہ انداز بنتا ہے۔

میڈیا رپورٹس کے مطابق وزیر برائے حج و عمرہ ڈاکٹر توفیق الربیعہ نے مختلف ممالک کے سرکاری حجاج دفاتر کے سربراہان سے حج عظمیٰ سمپوزیم کے موقع پر منعقدہ ایک نشست میں گفتگو کرتے ہوئے ان رہنما ہدایات پر سختی سے عمل درآمد کی ضرورت پر زور دیا۔ انہوں نے بین الاقوامی وفود سے بھرپور تعاون کی اپیل کرتے ہوئے کہا کہ ان احتیاطی تدابیر کی پابندی حجاج کی سہولت اور حفاظت کی ضامن ہے۔

اسی تسلسل میں سعودی وزارتِ صحت نے بھی حجاج کو سورج کی شعاعوں سے بچاؤ کے لیے مسلسل چھتریوں کے استعمال کی اہمیت پر زور دیا ہے، خاص طور پر چونکہ اس برس حج کا موسم مکہ مکرمہ میں شدید گرمی کے ساتھ آیا ہے۔ وزارت نے واضح کیا کہ سورج کی تپش سے بچنے اور گرمی کے باعث لاحق ہونے والی ممکنہ طبی پیچیدگیوں سے بچاؤ کے لیے حجاج کرام دورانِ مناسک ہر ممکن احتیاط کریں۔

(بشکریہ العربیہ ڈاٹ نیٹ)