رمضان اسپیشل انڈا چاٹ: افطار میں پروٹین سے بھرپور انتخاب

رمضان المبارک میں افطار کے وقت جسم کو فوری توانائی اور متوازن غذا کی ضرورت ہوتی ہے۔ اگرچہ پکوڑے اور سموسے دسترخوان کی روایت کا حصہ ہیں، تاہم مسلسل تلی ہوئی اشیا لینے سے طبیعت بوجھل ہو سکتی ہے۔ ایسے میں انڈا چاٹ ایک ایسا انتخاب ہے جو ذائقے میں بھی بھرپور ہے اور غذائیت کے اعتبار سے بھی بہتر سمجھا جاتا ہے۔

انڈا اعلیٰ معیار کا پروٹین فراہم کرتا ہے جبکہ چنے فائبر اور توانائی دیتے ہیں۔ یہی وجہ ہے کہ انڈا چاٹ افطار کے لیے ایک متوازن اور ہلکی ڈش کے طور پر پیش کی جا سکتی ہے۔

اجزا:

اُبلے ہوئے انڈے چار عدد
اُبلے ہوئے سفید چنے ایک کپ
باریک کٹی ہوئی پیاز ایک عدد درمیانی
باریک کٹا ہوا ٹماٹر ایک عدد
باریک کٹی ہری مرچ ایک عدد
ہرا دھنیا دو کھانے کے چمچ
نمک آدھا چائے کا چمچ یا حسبِ ذائقہ
چاٹ مصالحہ ایک چائے کا چمچ
بھنا ہوا زیرہ پاؤڈر آدھا چائے کا چمچ
لال مرچ پاؤڈر آدھا چائے کا چمچ
اِملی کی میٹھی چٹنی دو کھانے کے چمچ
لیموں کا رس ایک کھانے کا چمچ

ترکیب

سب سے پہلے اُبلے ہوئے انڈوں کو چھیل کر گول قتلے کاٹ لیں۔ ایک بڑے پیالے میں اُبلے ہوئے چنے ڈالیں اور اس میں باریک کٹی پیاز، ٹماٹر، ہری مرچ اور ہرا دھنیا شامل کریں۔

اب اس آمیزے میں نمک، چاٹ مصالحہ، بھنا ہوا زیرہ اور لال مرچ پاؤڈر شامل کر کے ہلکے ہاتھ سے مکس کریں۔ اس کے بعد املی کی میٹھی چٹنی اور لیموں کا رس شامل کریں تاکہ ذائقے میں ہلکی سی کھٹاس اور مٹھاس پیدا ہو جائے۔

آخر میں انڈوں کے قتلے اوپر سے رکھ کر ہلکے ہاتھ سے مکس کریں یا انہیں سجاوٹ کے انداز میں ترتیب دیں تاکہ ان کی شکل برقرار رہے۔

پیش کرتے وقت مزید ہرا دھنیا چھڑک دیں۔ اگر چاہیں تو تھوڑی سی اضافی چاٹ مصالحہ اوپر سے ڈال سکتے ہیں۔

اس طرح تیار کی گئی انڈا چاٹ نہ صرف افطار کے دسترخوان کو رنگین بناتی ہے بلکہ روزے کے بعد جسم کو متوازن غذائیت بھی فراہم کرتی ہے۔ رمضان میں ذائقہ اور صحت کا یہی امتزاج دسترخوان کو مکمل بناتا ہے۔