جامعہ ہمدرد کے ’روفیدہ کالج آف نرسنگ‘ میں انڈر گریجویٹ و پوسٹ گریجویٹ بیچ-2025 کے لیے تعارفی پروگرام منعقد

نئی دہلی: روفیدہ کالج آف نرسنگ، جامعہ ہمدرد نے اپنے ایم ایس سی نرسنگ، بی ایس سی (آنرز) نرسنگ، پوسٹ بیسک بی ایس سی نرسنگ اور ڈی جی این ایم کے پہلے سال کے طلبا و طالبات کے لیے تعارفی پروگرام کا انعقاد 24 نومبر 2025 کو جامعہ ہمدرد کے کنونشن سینٹر، نئی دہلی میں کیا۔ پروگرام میں مجموعی طور پر 176 طلبا و طالبات نے شرکت کی۔ پروگرام کی مہمانِ خصوصی بھولی آہلووالیہ، چیئرپرسن، انڈین اسپلائنل انجریز سینٹر، وسنت کنج، نئی دہلی تھیں، جبکہ گیسٹ آف آنر ڈاکٹر آچلا، اسسٹنٹ ڈائریکٹر جنرل (نرسنگ)، ڈی جی ایچ ایس، وزارتِ صحت و خاندانی بہبود، حکومتِ ہند تھیں۔

تقریب کا آغاز رابعہ مسجد کے امام صاحب کی تلاوتِ قرآنِ پاک سے ہوا، جس کے بعد نرسنگ کے طلبہ نے ہمدرد ترانہ پیش کیا۔ اپنے استقبالیہ خطاب میں پروفیسر وینا شرما، ڈین و پرنسپل، روفیدہ کالج آف نرسنگ، اسکول آف نرسنگ ایجوکیشن اینڈ ریسرچ، نے نو داخل شدہ طلبا و طالبات کا خیر مقدم کیا اور جامعہ کے بانی مرحوم حکیم عبدالحمید کو خراجِ عقیدت پیش کیا۔ انہوں نے کالج کی نمایاں کامیابیوں، قومی درجہ بندی میں اعلیٰ مقام اور 100 فیصد روزگار کے شاندار ریکارڈ کو اجاگر کرتے ہوئے طلبا کو نصیحت کی کہ وہ جامعہ ہمدرد میں دستیاب تمام علمی و پیشہ ورانہ مواقع سے بھرپور فائدہ اٹھائیں۔

مہمانِ خصوصی بھولی آہلووالیہ نے اپنے خطاب میں طلبا کی خدمتِ خلق پر مبنی پیشہ منتخب کرنے پر حوصلہ افزائی کی اور کہا کہ شعبۂ صحت میں نرسز کا کردار انتہائی اہم اور ہمدردی پر مبنی ہے۔ گیسٹ آف آنر ڈاکٹر آچلا نے نئے بیچ کو مبارکباد دیتے ہوئے اسے ایک تبدیلی کی علمی و عملی سفر کا آغاز قرار دیا۔ انہوں نے طلبا کو مشورہ دیا کہ وہ تعلیم اور ہم نصابی سرگرمیوں میں بھرپور دلچسپی سے حصہ لیں۔

اپنے صدارتی خطاب میں پروفیسر (ڈاکٹر) ایم افشار عالم، قابلِ احترام وائس چانسلر، جامعہ ہمدرد نے طلبا کو این اے اے سی کے ’اے+‘ گریڈ یافتہ ادارے میں خوش آمدید کہا۔ انہوں نے روفیدہ کالج آف نرسنگ کے سخت تعلیمی معیار اور محنتی فیکلٹی کو سراہا اور کہا کہ جامعہ کی زندگی سوچنے، سمجھنے، ہمدردی، نظم و ضبط اور قیادت کی صلاحیتوں کو فروغ دیتی ہے۔ پروگرام کا اختتام جمال فاطمہ ہاشمی، اسسٹنٹ پروفیسر کے اظہارِ تشکر کے ساتھ ہوا، جس کے بعد قومی ترانہ پیش کیا گیا۔