یہ کسان ہیں، دہشت گرد نہیں... نواب علی اختر

ملک کو اناج فراہم کرنے اور پیٹ کی آگ بجھانے والے کسان ایک بار پھر ا پنے مفادات اور حقوق کی حفاظت کے لیے سڑک پر اترے ہیں۔ نوجوانوں کے ساتھ خواتین اور بچے بھی شامل ہیں یہاں تک کہ ضعیف کسان بھی عصا کے سہارے پیدل مارچ کر تے نظر آرہے ہیں۔ اپنی جان کی پرواہ کیے بغیر سردی میں سڑک پر بیٹھے کسانوں کا صرف یہی مطالبہ ہے کہ ان کی آواز سنی جائے اور محنت کا اعتراف کرتے ہوئے ان کے حقوق کی حفاظت کی جائے۔ مگر وائے ہو اس حکومت پر جو صبح شام خواتین کو با اختیار بنانے اور بزرگوں کا سہارا بننے یہاں تک کہ نوجوانوں کو ہر طرح سے خود کفیل بنانے کا دعویٰ کرتے نہیں تھکتی ہے، آج اپنا حق مانگنے والے کسانوں پر فائرنگ، آنسو گیس کے گولے اور پانی کی بوچھاریں مار مار کر محنت کشوں کے ساتھ دہشت گردوں جیسا سلوک کر رہی ہے۔

حد تو تب ہوگئی جب حق کی لڑائی لڑنے والے کسانوں میں خالصتانی عناصر کو شامل بتا کر پر امن مظاہرین کو دہشت گرد بتانے کی کوشش کی گئی۔ پچھلے دنوں مرکزی حکومت کی جانب سے منظور کیے گئے زرعی قوانین کے خلاف کسان کئی ماہ سے احتجاج کر رہے ہیں مگر حکومت کے کان پر جوں تک نہیں رینگی۔ حکمراں طبقہ شاید یہی سوچ رہا تھا کہ ملک بھر کے انصاف پسندوں کو حوصلہ دینے والے شاہین باغ تحریک کو جس طرح ختم کردیا گیا تھا اسی طرح کسانوں کو بھی اپنے گھروں کو لوٹ جانے پر مجبور کردیا جائے گا مگر حکمرانوں کو یہ اندازہ نہیں تھا کہ جب حق کی بات آتی ہے تو ہندوستان کا شہری پیچھے نہیں ہٹتا ہے اور اس کی تازہ مثال کسان تحریک ہے۔

آخر کارحکومت کو اب کسان تحریک کی سنگینی کا احساس ہوا ہے تبھی وزیر زراعت کے ساتھ ساتھ وزیر داخلہ بھی حرکت میں آئے ہیں۔ ویسے تو مرکز کی مودی حکومت میں ملک کا ہر طبقہ اور ہر شعبہ غیر مطمئن نظر آرہا ہے تاہم لوگ حکومت کے خلاف احتجاج سے ممکنہ حد تک گریزاں ہیں کیونکہ اب تک یہی دیکھا گیا ہے کہ جس نے بھی اپنے حق کی آواز اٹھائی ہے اسے یا تو دہشت گرد ثابت کر کے سلاخوں کے پیچھے دھکیل دیا گیا ہے یا تو غدار ثابت کر کے اس کی زندگی اجیرن کردی گئی ہے۔ مگر اب وقت کے ساتھ ساتھ لوگوں کے خیالات بدل رہے ہیں۔ مختلف شعبہ جات میں اپنے اپنے طور پر احتجاج بھی شروع کردیا گیا ہے لیکن ایک منظم اور جامع انداز میں احتجاج سے ابھی تک مودی حکومت بچی ہوئی ہے۔

کسان برادری ایسی ہے جس نے وقفہ وقفہ سے احتجاج درج کرواتے ہوئے اپنی ناراضگی کا اظہار کیا ہے۔ اس سلسلہ میں حکومت کی طاقت کی پرواہ کیے بغیر کئی بار کسان سڑکوں پر اترے ہیں جن پر لاٹھیاں برسائی گئیں، آنسو گیس کے گولے داغے گئے اور فائرنگ تک کی گئی اس کے باوجود کسان اپنے مقصد کے لیے آگے بڑھتے رہے۔ کسانوں کا کہنا ہے کہ مودی حکومت کسانوں کی بہتری اور اصلاحات کے نام پر جو قوانین بنا رہی ہے وہ در اصل انہیں کاروباری طبقے کا غلام بنانے کی کوشش ہے۔ ان نئے قوانین کے نتیجہ میں کسانوں کے مفادات بری طرح سے متاثر ہوں گے اور جس طرح سے تقریباً ہرشعبہ پر کاروباریوں نے قبضہ جمالیا ہے اسی طرح سے زرعی شعبہ بھی کاروباریوں کے رحم و کرم پر چلا جائے گا۔

یہ ایک اٹل حقیقت ہے کہ مودی حکومت ملک کے تقریباً ہر شعبہ کو مٹھی بھر کاروباریوں کے حوالے کرنے سے گریز نہیں کر رہی ہے۔ ان حالات میں کسانوں کو جو اندیشے ہیں وہ بے بنیاد نہیں ہو سکتے۔ جس وقت اس شعبہ میں کاروباریوں کا داخلہ ہوجائے گا، ان کی اجارہ داری بڑھ جائے گی اور ان کے رحم و کرم پر کسان آجائیں گے اس وقت حکومت بھی کسانوں کو فی الحال دی جانے والی مراعات اور امداد اچانک ختم کر سکتی ہے۔ ہمارے سامنے پٹرولیم مصنوعات کی مثال موجود ہے۔ حکومت کا پٹرول، ڈیزل کی قیمتوں پر اب کوئی کنٹرول نہیں رہ گیا ہے۔ کاروباری طبقہ اپنی مرضی کے مطابق قیمتیں بڑھا رہا ہے۔ کسانوں کا جو احتجاج ہے وہ ان کے اپنے مفادات کے لیے ہے، ان کے اپنے تحفظ کے لیے ہے، حکومت ان کسانوں کے اندیشوں کو دور کرنے میں کامیاب نہیں ہوسکی ہے۔

بد قسمتی کی بات یہ ہے کہ اپنے جائز مطالبات کے ساتھ سڑکوں پر اترے کسانوں کو دہشت گرد ثابت کر کے ان کی تحریک کو کمزور کرنے کی کوشش کی جا رہی ہے۔ ان حالات میں بعید نہیں کہ اپنے ہی چند ’تربیت یافتہ‘ لوگوں کو مظاہرین کے درمیان سے گرفتار دکھا کر یہ کہا جائے کہ کسان تحریک کے نام پر لوگوں کو بھڑکا کر حکومت اور کچھ بڑے لیڈروں کے خلاف دہشت گردی کا منصوبہ بنا رہے تھے۔ ایسے امکانات کم ہی ہیں کیونکہ اب تک یہی دیکھا گیا ہے کہ ملک کا کسان حالات اور موسم سے بخوبی واقف ہوتا ہے اور مکمل نظم وضبط کے ساتھ اپنے منصوبے کو پایہ تکمیل تک پہنچاتا رہا ہے۔ مظاہرین کو غیر سماجی عناصر کہنے والے لوگوں کو موقع پر جاکر دیکھنا چاہیے کہ کس طرح کسان سڑک پر بیریکیڈ لگا کر روکنے والے پولیس اہلکاروں کو پانی پلا رہے ہیں اور کھانا کھلاتے نظر آرہے ہیں۔

اس تحریک کو کسی مذہب کا نام دیا جانا غلط ہوگا کیونکہ سوشل میڈیا پر وائرل ہو رہی ویڈیوز میں دیکھا جا رہا ہے کہ جس علاقے سے کسان مارچ کرتے نکل رہے ہیں وہاں ٹوپی پہنے مسلمان نوجوان، بزرگ کھانے پینے کی اشیاء تقسیم کر رہے ہیں۔ شاید یہی وجہ ہے کہ حکمراں طبقہ اس تحریک کو کمزور کرنے کی کوششوں میں مصروف ہو کر اپنے ہی قانون کی دھجیاں بھی اڑا رہا ہے۔ ہریانہ جیسی کسانوں پر مشتمل ریاست کے وزیر اعلیٰ منوہرلال کھٹر کہتے ہیں کہ وہ (کسان) ان کی ریاست کے نہیں ہیں، کسان تحریک کو پنجاب کے کسانوں نے کھڑا کیا ہے۔ اس تحریک کو کسانوں کے بجائے سیاسی پارٹیوں اور تنظیموں نے منعقد کیا ہے۔ اس کے ساتھ ہی انہوں نے کہا کہ بھیڑ میں کچھ غیر سماجی عناصر ان سے ملے ہیں، ہم نے رپورٹ کی ہے۔ کھٹر صاحب کا اشارہ واضح طور پر خالصتانی عناصر کی طرف ہے۔ کچھ میڈیا رپوٹوں میں کہا جا رہا ہے کہ اس تحریک میں خالصتانی عناصر بھی شامل ہیں، جو لگاتار مودی مخالف نعرے بازی کر رہے ہیں۔

ایک روزقبل ہی بی جے پی حکومت کے وزیر اعلیٰ منوہر لال کھٹر نے اپنے ٹوئٹ میں کہا ہے کہ راجستھان کا باجرا ہریانہ میں نہیں بیچنے دیا جائے گا۔ جب کہ انہی کی پارٹی کی قیادت والی مرکزی حکومت کی طرف سے تیار کیے گئے زرعی قانون میں صاف طور پر کہا گیا ہے کہ ملک کا کسان کسی بھی ریاست میں جاکر اپنی پیداوار فروخت کرسکتا ہے۔ کھٹر کے رویئے سے اندازہ لگایا جاسکتا ہے کہ جس قانون کو مودی حکومت کسانوں کے حق میں بتا رہی ہے، اسی قانون کی دھجیاں اڑاتے ہوئے انہیں کا وزیر اعلیٰ کسانوں کو دھمکی آمیز لہجے میں خبردار کررہا ہے۔ ایسے میں یہی کہا جاسکتا ہے کہ جب حکمراں طبقہ ہی قانون کی دھجیاں اڑائے گا تو ایک عام آدمی اگر ایسا کرے تو کیا غلط ہوگا۔