معروف شاعر اور ادیب امجد اسلام امجد کا انتقال

اسلام آباد: معروف شاعر، ادیب اور ڈرامہ نگار امجد اسلام امجد کا 78 سال کی عمر میں دل کا دورہ پڑنے سے انتقال ہو گیا۔ امجد اسلام امجد کے اہلِ خانہ نے ان کی لاہور میں وفات کی تصدیق کی ہے۔ اہل خانہ کا کہنا ہے کہ وہ کچھ وقت سے بیمار چل رہے تھے۔

امجد اسلام امجد نے شاعر، ڈرامہ نگار اور نقاد کی حیثیت سے شہرت حاصل کی۔ ان کے مشہور ڈراموں میں وارث، دن اور فشار شامل ہیں۔ امجداسلام امجد کا شعری مجموعہ برزخ اور جدید عربی نظموں کے تراجم عکس کے نام سے شائع ہوا۔ مزید برآں افریقی شعرا کی نظموں کا ترجمہ کالے لوگوں کی روشن نظمیں کے نام سے شائع ہوا۔ امجد اسلام امجد کو حکومت پاکستان کی جانب سے ستارہ امتیاز، صدارتی تمغہ حسن کارکردگی سمیت کئی ایوارڈ سے نوازا گیا تھا۔

امجد اسلام امجد 4 اگست 1944 کو لاہور میں پیدا ہوئے تھے۔ انہوں نے 1967 میں پنجاب یونیورسٹی سے ایم اے (اردو) کیا، 1968 تا 1975 ایم اے او کالج لاہور کے شعبہ اردو میں استاد رہے۔ اگست 1975 میں امجد اسلام امجد کو پنجاب آرٹ کونسل کا ڈپٹی ڈائریکٹر مقرر کیا گیا۔ امجد اسلام امجد 90 کی دہائی میں دوبارہ ایم اے او کالج میں ہی شعبہ تدریس سے منسلک ہو گئے۔

امجد اسلام امجد نے کا کریئر 50 سال سے زائد عرصے پر محیط تھا جس کے دوران انہوں نے 40 سے زائد کتابیں لکھیں اور اپنے زمانے کے کئی مقبول ڈرامے لکھے۔ انہوں نے ادبی خدمات اور ٹی وی رائٹنگ پر صدارتی تمغہ برائے حسن کارکردگی اور ستارۂ امتیاز سمیت کئی اعزازات حاصل کئے۔