پاکستان حکومت نے آرمی چیف جنرل عاصم منیر کو دیا تحفہ، 2027 تک عہدہ پر رہیں گے برقرار

پاکستان کے موجودہ آرمی چیف جنرل عاصم منیر کو پاکستان حکومت نے ایک بڑا تحفہ دیا ہے۔ اب وہ 2027 تک اس عہدہ پر برقرار رہیں گے۔ حال ہی میں ہندوستان کے ساتھ ہوئی جنگ کے بعد حکومت نے انھیں پروموٹ کر کے فیلڈ مارشل بنایا تھا۔ اس طرح وہ فوجی تاناشاہ ایوب خان کے بعد پاکستان کے دوسرے فیلڈ مارشل بن گئے۔ اب ان کی آرمی چیف کی کرسی بھی پوری طرح محفوظ کر دی گئی ہے۔ وہ 29 نومبر 2027 تک اس عہدہ پر بنے رہیں گے۔

پاکستان حکومت کے ذریعہ بنائے گئے نئے قانون کے مطابق اب فوجی سربراہان (بری، بحری اور فضائی) کی مدت کار 3 سال کی جگہ پورے 5 سال ہوگی۔ یعنی ایک مرتبہ کوئی بھی سربراہ مقرر ہو جائے تو وہ 5 سالوں تک اسی عہدہ پر رہے گا۔ سرکاری ذرائع کے مطابق یہ معاملہ پہلے ہی قانون کے ذریعہ طے ہو چکا ہے اور کسی نئے قدم یا تبدیلی کی ضرورت نہیں ہے۔

4 نومبر 2024 کو پارلیمنٹ میں پاس ہوئے قانون کے بعد یہ اصول نافذ ہو چکا ہے۔ جنرل (فیلڈ مارشل) سید عاصم منیر کو 29 نومبر 2022 کو آرمی چیف مقرر کیا گیا تھا۔ نئے قانون کے نفاذ کے بعد ان کی مدت کار 29 نومبر 2027 تک ہو گئی ہے۔ حالانکہ کچھ حلقوں میں یہ افواہ ضرور پھیل رہی ہے کہ وہ نومبر 2025 میں سبکدوش ہو رہے ہیں، لیکن حکومت نے صاف کر دیا ہے کہ یہ پوری طرح سے غلط ہے۔

ایئر چیف مارشل ظہیر احمد بابر سدّو کی بات کریں، تو ان کی تقرری 19 مارچ 2021 کو ہوئی تھی۔ ان کی مدت کار بھی اب نیا قانون نافذ ہونے کے بعد 19 مارچ 2026 تک ہوگی۔ حکومت نے مئی 2025 میں ہی یہ اعلان کر دیا تھا کہ مارچ 2026 کے بعد بھی ان کی خدمات جاری رکھی جائیں گی۔