عمران خان کو کسی انہونی کا اندیشہ، کہا- ’مجھے کچھ ہوا تو اس کے ذمہ دار عاصم منیر ہوں گے‘

 جیل میں بند پاکستان کے سابق وزیر اعظم عمران خان نے کہا کہ اگر جیل میں ان کے ساتھ کوئی بھی انہونی ہوتی ہے تو اس کے ذمہ دار فوجی سربراہ فیلڈ مارشل عاصم منیر ہوں گے۔ دراصل پاکستان تحریک انصاف (پی ٹی آئی) شہباز شریف حکومت اور فوجی اداروں پر عمران خان کو رہا کرنے کا دباؤ بنانے کے لیے 5 اگست کو پورے ملک میں ایک بڑی مہم کی شروعات کرنے کی تیاری کر رہا ہے۔

عمران خان نے سوشل میڈیا سائٹ ’ایکس‘ پر ایک پوسٹ میں کہا، ’’حال کے دنوں میں جیل میں میرے ساتھ ہونے والا سخت سلوک اور بھی بڑھ گیا ہے۔ یہی رویہ میری اہلیہ بشریٰ بی بی کے خلاف بھی اپنایا جا رہا ہے۔ یہاں تک کہ ان کی کوٹھری کا ٹی وی بھی بند کر دیا گیا ہے۔ ہم دونوں کے سبھی بنیادی حقوق چاہے وہ انسانی ہوں یا قیدیوں کو دی گئی قانونی معطل کر دیئے گئے ہیں۔‘‘

عمران خان نے کہا کہ اس کے لیے جوابدہی ہونی چاہیے۔ انہوں نے دعویٰ کیا کہ وہ پوری طرح سے جانتے ہیں کہ ایک کرنل اور جیل سپرنٹنڈنٹ ’عاصم منیر کے حکم پر‘ کارروائی کر رہے ہیں۔ سابق وزیر اعظم نے کہا، ’’اس لیے میں اپنی پارٹی کو واضح ہدایت دیتا ہوں کہ اگر جیل میں میرے ساتھ کچھ بھی ہوتا ہے تو عاصم منیر کو ذمہ دار ٹھہرایا جانا چاہیے۔‘‘

عمران خان نے آگے کہا، ’’میں اپنی پوری زندگی جیل میں گزارنے کو تیار ہوں، لیکن ظلم و جبر کے آگے جھکنے کا سوال نہیں اٹھتا۔ پاکستان کے عوام کے لیے میرا پیغام ایک ہی ہے- کسی بھی حالت میں اس جابرانہ نظام کے آگے نہ جھکیں۔‘‘

عمران خان نے ایک بار پھر دہرایا کہ بات چیت کا وقت گزر چکا ہے،اب ملک گیر احتجاج کا وقت ہے۔ خان نے کہا کہ یہاں تک کہ قصوروار ٹھہرائے گئے قاتلوں اور دہشت گردوں کو بھی ان سے بہتر حالت میں رکھا جاتا ہے۔ انہوں نے ایک فوجی اہلکار کا نام لیتے ہوئے کہا کہ اسے جیل میں وی آئی پی سہولت دی جا رہی ہے۔

پنجاب کی وزیر اعلیٰ مریم نواز اور وفاقی وزیر داخلہ محسن نقوی کی تنقید کرتے ہوئے عمران خان نے کہا کہ دونوں نے گزشتہ دو برسوں سے پنجاب کے لوگوں پر ظلم اور فاشزم کا ماحول بنا رکھا ہے۔

عمران خان کی بہن علیمہ خان نے بھی ذرائع ابلاغ کے نمائندوں کو بتایا کہ عمران نے پی ٹی آئی کے اراکین کو پیغام دیا ہے کہ اگر جیل میں ان کے ساتھ کچھ بھی ہوتا ہے تو جنرل عاصم منیر کو اس کے لیے ذمہ دار ٹھہرایا جائے۔