پاکستان: جاری تشدد کے درمیان لاہور میں موجود 32 ہندوستانی کھلاڑیوں کو فوراً پاکستان چھوڑنے کی ہدایت

اس وقت پاکستان میں حالات انتہائی کشیدہ ہیں اور کئی شہروں میں تشدد والا ماحول دیکھنے کو مل رہا ہے۔ سابق وزیر اعظم عمران خان کی گرفتاری کے بعد سے ہی پورے ملک میں ہنگامہ برپا ہے۔ چاروں طرف احتجاجی مظاہرے ہو رہے ہیں اور آگ زنی کے ساتھ ساتھ کچھ مقامات پر بمباری کی خبریں بھی سامنے آ رہی ہیں۔ اس درمیان برج ٹورنامنٹ (کارڈ یعنی تاش کا مقابلہ) میں حصہ لینے لاہور گئے ہندوستانی کھلاڑیوں کو فوراً پاکستان چھوڑنے کی ہدایت دی گئی ہے۔

دراصل ہندوستان کے 32 کھلاڑی لاہور میں چل رہے ایشین اینڈ مڈل ایسٹ برج ٹورنامنٹ میں حصہ لینے گئے تھے۔ یہ ٹورنامنٹ 5 مئی کو شروع ہوا تھا اور 13 مئی کو یہ ختم ہونا ہے۔ ہندوستانی کھلاڑیوں نے واگھا بارڈر سے پاکستان میں انٹری کی تھی، لیکن اب ہندوستانی ہائی کمیشن نے انھیں فوراً لاہور سے ہندوستان واپس لوٹنے کی ہدایت دی ہے۔ اس کا مطلب صاف ہے کہ برج ٹورنامنٹ درمیان میں ہی روکا جا سکتا ہے۔

قابل ذکر ہے کہ پاکستان میں چل رہے برج ٹورنامنٹ میں ہندوستان کے علاوہ فلسطین، سعودی عرب، یو اے ای، اردن اور بنگلہ دیش کے کھلاڑی بھی حصہ لینے پہنچے ہیں۔ جس طرح کے حالات پاکستان میں پیدا ہو گئے ہیں، اسے دیکھنے کے بعد یہی لگ رہا ہے کہ اس ٹورنامنٹ کو درمیان میں ہی ملتوی کرنا پڑے گا۔ اچھی بات یہ رہی کہ پاکستان دورہ پر گئی نیوزی لینڈ کی کرکٹ ٹیم اس تشدد کی زد میں نہیں آئی، کیونکہ وہ اپنا دورہ مکمل کر کے ملک واپس لوٹ چکی ہے۔

واضح رہے کہ پاکستان میں نظامِ قانون اس وقت پوری طرح سے تباہ ہوتا ہوا دکھائی دے رہا ہے۔ عمران خان کی پارٹی پی ٹی آئی کے کارکنان اپنے لیڈر کی گرفتاری کے بعد جگہ جگہ تشدد کر رہے ہیں۔ جواب میں پولیس نے کچھ مقامات پر فائرنگ بھی کی ہے۔ مظاہرین پولیس پر بم سے بھی حملہ کر رہے ہیں۔ یہی وجہ ہے کہ ہندوستانی کھلاڑیوں کو فوراً ہندوستان لوٹنے کو کہا گیا ہے۔