وائٹ ہاؤس نے ’یو ایس انسٹی ٹیوٹ آف پیس‘ کا نام ہی تبدیل کر دیا

وائٹ ہاؤس نے یو ایس انسٹی ٹیوٹ آف پیس کا نام تبدیل کر کے ڈونالڈ جے ٹرمپ انسٹی ٹیوٹ آف پیس رکھ دیا ہے۔ یہ تبدیلی کسی نئی قانون سازی کے ذریعہ نہیں کی گئی۔ یہ محض ایک ری برانڈنگ تھا۔ نام بدلنے کے پیچھے کا مقصد واضح نہیں ہے لیکن یہ ضرور ہے کہ دنیا میں  امن کا کریڈٹ ڈونالڈ ٹرمپ کو دینا ہے۔

یہ تبدیلی ایسے وقت میں آئی ہے جب ٹرمپ خود کو امن کے لیے ایک اولین وکیل کے طور پر پیش کر رہے ہیں۔ وائٹ ہاؤس کے امریکی انسٹی ٹیوٹ آف پیس کا نام تبدیل کرکے ڈونالڈ جے ٹرمپ انسٹی ٹیوٹ آف پیس رکھنے کے فیصلے کے بارے میں پوچھے جانے پر وائٹ ہاؤس نے کہا کہ اس کا نام صدر ٹرمپ کے نام پر رکھا گیا ہے۔

محکمہ خارجہ نے ایک پوسٹ میں کہا کہ صدر ٹرمپ نے طاقت کے ذریعہ ایک نئے دور کا آغاز کیا ہے۔ ان کے عزم نے دنیا بھر میں امن قائم کیا ہے۔ اس سے امریکہ کی عالمی عزت بحال ہوئی ہے۔ واضح رہے کہ ٹرمپ مسلسل دنیا بھر میں آٹھ جنگیں روکنے کا دعویٰ کرتے رہے ہیں۔ انہوں نے پاکستان اور ہندوستان کے درمیان جنگ روکنے کا سہرا بھی اپنے سر لیا تاہم ہندوستانی حکومت نے اس کی تردید کی ہے۔

واضح رہے کہ یونائیٹڈ اسٹیٹس انسٹی ٹیوٹ آف پیس امریکہ میں ایک آزاد، غیر جانبدار حکومتی ادارہ ہے جس کا بنیادی مشن پرتشدد تنازعات کو روکنا، حل کرنا اور امن کو آسان بنانا ہے۔ یونائیٹڈ اسٹیٹس انسٹی ٹیوٹ آف پیس کی توجہ براہ راست جنگیں لڑنے پر نہیں ہے، بلکہ جنگوں کو روکنے اور امن کے راستے تلاش کرنے پر ہے۔ اس میں تنازعات کا حل، خانہ جنگیوں پر تحقیق، سیاسی تشدد، اور دنیا کے مختلف حصوں میں مذہبی تنازعات، اور حکومتوں اور تنظیموں کو امن مذاکرات کے طریقوں پر پالیسی مشورہ فراہم کرنا شامل ہے۔