امریکہ انتخاب: بائڈن ہوں گے نئے صدر، پنسلوینیا میں لہرایا فتح کا پرچم، ہند نژاد کملا ہیرس بنیں گی نائب صدر

امریکہ میں طویل ووٹ شماری کے بعد بالآخر یہ صاف ہو گیا کہ ملک نے نئے صدر کا انتخاب کیا ہے۔ ریپبلکن صدارتی امیدوار ڈونالڈ ٹرمپ کو مسترد کرتے ہوئے ڈیموکریٹس امیدوار جو بائڈن کو صدر عہدہ کے لیے چن لیا گیا ہے۔ اس بات کی تصدیق خبر رساں ادارہ اے پی نے کی ہے جس کے مطابق بائڈن نے 284 الیکٹورل ووٹ حاصل کر اپنے حریف ڈونالڈ ٹرمپ کو شکست دے دی۔ میڈیا ذرائع سے موصول ہو رہی خبروں کے مطابق پنسلوینیا میں جیت کے ساتھ ہی یہ طے ہو گیا کہ بائڈن ہی امریکہ کے نئے صدر ہوں گے۔ علاوہ ازیں ہند نژاد کملا ہیرس کے لیے نائب صدر بننے کی راہ بھی ہموار ہو گئی ہے۔

اس درمیان ڈونالڈ ٹرمپ نے وہائٹ ہاؤس میں ایک پریس کانفرنس کیا جس میں کہا کہ وہ انتخابی بدعنوانی کے خلاف عدالت میں جائیں گے۔ انھوں نے انتخاب میں بڑے پیمانے پر دھاندلی کا الزام عائد کیا، لیکن اس سلسلے میں کوئی ثبوت پیش نہیں کیا۔ حالانکہ بائڈن کی انتخابی ٹیم نے اس طرح کے سبھی الزامات کو مسترد کر دیا۔ یہاں قابل ذکر ہے کہ ٹرمپ کی ٹیم نے پنسلوینیا، مشیگن، جارجیا اور نیواڈا کے تعلق سے پہلے ہی مقدمہ درج کرا دیا ہے۔ انھوں نے وسکانسن میں بھی ووٹوں کی دوبارہ گنتی کرائے جانے کا مطالبہ کیا ہے۔