مغربی کنارہ-اردن سرحد پر 2 اسرائیلی شہری کا قتل، غزہ جا رہے امدادی ٹرک میں سوار ہوکر آیا تھا حملہ آور

مغربی کنارہ اور اردن کے درمیان ایلنبی کراسنگ پر ایک حملہ آور نے 2 اسرائیلی شہریوں کو چاقو مار کر ہلاک کر دیا۔ آئی ڈی ایف نے کہا کہ حملہ آور امدادی سامان لے جانے والے ٹرک میں سوار تھا۔ ابتدائی تحقیقات میں یہ بات سامنے آئی ہے کہ اسرائیلی افسران کے ذریعہ ٹرک کی جانچ سے قبل ہی کراسنگ پر موجود لوگوں پر اس شخص نے ہینڈگن سے گولیاں چلانی شروع کر دیں۔ اس کے بعد حملہ آور ٹرک سے باہر نکلا۔ اس کی بندوق جام ہوگئی تھی، اس لیے اس نے 2 لوگوں پر چاقو سے تیزی کے ساتھ حملہ کیا۔ بعد میں جائے وقوعہ پر موجود ڈاکٹروں نے انہیں مردہ قرار دے دیا۔ ’میگن ڈیوڈ ایڈوم‘ کے مطابق مہلوکین میں سے ایک کی عمر 60 سال جبکہ دوسرے کی عمر 20 سے 25 سال تھی۔

واضح ہو کہ پولیس نے اب تک اس واقعہ پر کوئی آفیشیل بیان جاری نہیں کیا ہے۔ گزشتہ ایک ماہ میں یہ دوسرا معاملہ ہے جب اسرائیلی شہری پر قاتلانہ حملہ کیا گیا ہے۔ اس سے قبل 8 ستمبر کو ایک فلسطینی شوٹر نے یروشلم بس اسٹاپ پر فائرنگ کر دی تھی، جس میں 6 اسرائیلی شہری ہلاک ہو گئے تھے۔

کچھ عبرانی میڈیا رپورٹس میں دعویٰ کیا گیا ہے کہ اس واقعہ میں شامل حملہ آور اردن سے غزہ پٹی جا رہے ایک امدادی ٹرک میں سوار ہو کر آیا تھا۔ ’چینل 12‘ کی رپورٹ کے مطابق وہ غزہ پٹی میں انسانی امداد کی فراہمی کے کام میں شامل تھا اور اس کے پاس اسرائیلی اجازت نامہ بھی تھا۔ رپورٹس کے مطابق 2 اسرائیلی شہریوں کو چاقو مار کر ہلاک کرنے والے حملہ آور کو اسرائیلی فوج نے فائرنگ میں ہلاک کر دیا۔