اسرائیلی وزیر اعظم بنجامن نیتن یاہو سمیت 37 افراد کے خلاف ترکیہ نے جاری کیا گرفتاری وارنٹ، غزہ میں نسل کشی کا ہے الزام

اسرائیل اور حماس کے دوران طویل عرصہ سے جاری جنگ کے بعد حال ہی میں جنگ بندی ہوئی ہے۔ اب ترکیہ نے اسرائیل کے خلاف کارروائی کرنے کا فیصلہ لیا ہے۔ ترکیہ نے جمعہ (7 نومبر) کو اعلان کیا کہ اس نے اسرائیل کے وزیر اعظم بنجامن نیتن یاہو اور ان کی حکومت کے سینئر افسران کے خلاف نسل کشی کے الزام میں گرفتاری وارنٹ جاری کر دیا ہے۔ استنبول پراسیکیوٹر آفس کے بیان کے مطابق مجموعی طور پر 37 مشتبہ افراد کے خلاف گرفتاری وارنٹ جاری کیا گیا ہے۔ اس فہرست میں اسرائیل کے وزیر دفاع اسرائیل کاٹز، قومی سلامتی کے وزیر اتمار بین گویر اور آرمی چیف لیفٹیننٹ جنرل ایال ضمیر شامل ہیں، حالانکہ مکمل فہرست اب تک منظر عام پر نہیں آئی ہے۔

ترکیہ نے مذکورہ اسرائیلی رہنماؤں اور افسران کے خلاف غزہ میں منظم نسل کشی اور انسانیت کے خلاف جرائم کے الزامات عائد کیے ہیں۔ بیان میں ترکیہ-فلسطین فرینڈ شپ ہاسپٹل کا بھی تذکرہ ہے، جسے ترکیہ نے غزہ پٹی میں بنایا تھا اور اسرائیل نے اسے مارچ میں بمباری کر تباہ کر دیا تھا۔ ساتھ ہی ترکیہ نے گزشتہ سال جنوبی افریقہ کے اس معاملے میں بھی حصہ لیا تھا، جس میں اسرائیل پر بین الاقوامی عدالت انصاف (آئی سی جے) میں نسل کشی کا الزام عائد کیا گیا تھا۔

ترکیہ کی جانب سے گرفتاری وارنٹ جاری کرنے کے بعد اب اسرائیلی وزیر خارجہ گیدون سار کا بیان سامنے آیا ہے۔ انہوں نے سوشل میڈیا پلیٹ فارم ’ایکس‘ پر کہا کہ اسرائیل تانا شاہ (صدر رجب طیب اردوغان) کے اس نئے پبلسٹی اسٹنٹ کو سختی سے مسترد کرتا ہے۔ گیدون سار کا کہنا ہے کہ ’’اردوغان کی ترکیہ میں عدلیہ اب ایک ایسا آلہ بن گیا ہے، جس کا استعمال سیاسی مخالفین کو خاموش کرانے اور صحافیوں، ججوں اور میئرز کو حراست میں لینے کے لیے کیا جاتا ہے۔‘‘ ساتھ ہی انہوں نے رواں سال کی شروعات میں استانبول کے میئر اکریم اماموگلو کی گرفتاری کا حوالہ بھی دیا۔

واضح رہے کہ ترکیہ کی جانب سے اسرائیل کے خلاف گرفتاری وارنٹ ایسے وقت میں جاری کیا گیا ہے، جب امریکی صدر ڈونالڈ ٹرمپ کے علاقائی امن منصوبے کے تحت 10 اکتوبر سے فلسطینی علاقوں میں ایک نازک جنگ بندی نافذ ہے۔ دوسری جانب حماس نے ترکیہ کے اس قدم کا استقبال کیا ہے۔ حماس کا کہنا ہے کہ گرفتاری وارنٹ ترکیہ کے عوام اور اس کی قیادت کے عظیم انسانی جذبے اور اعلیٰ اصولوں کی تصدیق کرتا ہے۔

قابل ذکر ہے کہ رواں ہفتہ کی شروعات میں کئی مسلم اکثریتی ممالک استانبول میں جمع ہوئے تھے، تاکہ غزہ کے لیے بین الاقوامی استحکام فورس (آئی ایس ایف) پر بات چیت کی جا سکے۔ ایسا خیال کیا جا رہا ہے کہ یہ فورس رواں سال کی شروعات میں ڈونالڈ ٹرمپ کی جانب سے پیش کی گئی 20 نکاتی غزہ امن منصوبے میں اہم کردار ادا کرے گی۔ حالانہ امریکہ کے نائب صدر جے ڈی وینس نے کہا کہ غزہ میں کسی بھی غیر ملکی فوج کی تعیناتی کے لیے اسرائیل کی رضامندی ضروری ہوگی۔