روس اور یوکرین کے درمیان جنگ بندی کے لیے ٹرمپ کا ’ترکی پلان‘ ہوا فیل، پوتن کی غیر حاضری سے مشن مذاق بن گیا

روس اور یوکرین کے درمیان تقریباً 3 سال سے جاری جنگ کو ختم کرنے کی امریکی صدر ٹرمپ کی کوششیں مذاق بنتی ہوئی دکھائی دے رہی ہیں۔ ڈونالڈ ٹرمپ اور روسی صدر ولادمیر پوتن، دونوں کی غیر حاضری نے اس مشن کی سنجیدگی پر سوال کھڑے کر دیے ہیں۔ پوتن نے بات چیت میں شامل ہونے سے ہی انکار کر دیا ہے، اور اس طرح ٹرمپ کی 24 گھنٹے میں جنگ ختم کرنے کی بات پھر سے کھوکھلی ثابت ہوئی ہے۔

امن مذاکرہ سے عین قبل کریملن نے روسی نمائندہ کے نام جاری کر دیا، لیکن اس میں پوتن کا ہی نام موجود نہیں تھا۔ نمائندہ وفد کی قیادت روسی صدر کے مشیر اور تشہیری حکمت ساز ولادمیر میڈنسکی کریں گے۔ ان کے ساتھ نائب وزیر خارجہ میخائل گالوزن، فوجی خفیہ چیف ایگور کوستیوکوف اور نائب وزیر دفاع الیکزنڈر فومن بھی شامل ہیں۔ اس سے یہ صاف ہو گیا ہے کہ پوتن خود ترکی نہیں جا رہے ہیں، جس سے مذاکرہ کے قبل ہی دور میں کسی بڑے نتیجے کی امید مندمل ہو گئی ہے۔

قابل ذکر ہے کہ یوکرینی صدر ولودمیر زیلنسکی نے 14 مئی کو دیے گئے اپنے بیان میں کہا تھا کہ کیف اس وقت تک کوئی اگلا قدم نہیں اٹھائے گا جب تک ماسکو اپنے نمائندہ وفد کی جانکاری شیئر نہیں کرتا۔ کریملن کے اعلان کے بعد اب زیلنسکی کا اگلا رخ اہم ہوگا، لیکن پوتن کی غیر موجودگی اس مذاکرہ کو کمزور کر سکتی ہے۔

غور کرنے والی بات یہ ہے کہ ڈونالڈ ٹرمپ نے اس ہفتہ از سر نو دعویٰ کیا تھا کہ وہ جنگ کو 24 گھنٹے میں روک سکتے ہیں، لیکن ترکی میں ان کے ممکنہ سفر کا بھی اختتام ہو گیا۔ بدھ کو صحافیوں سے بات چیت میں انھوں نے کہا کہ وہ اپنے یو اے ای سفر کے منصوبہ پر قائم ہیں اور ابوظبی روانہ ہوں گے۔ انھوں نے یہ بھی کہا کہ ترکی کا دورہ شیڈول میں فٹ نہیں بیٹھتا، حالانکہ بعد میں انھوں نے ممکنہ تبدیلی کی گنجائش چھوڑی۔ یہ ایک ہفتے میں دوسری مرتبہ ہے جب ٹرمپ کی بڑی باتوں کی ہوا نکل گئی۔ اس سے قبل انھوں نے ہندوستان اور پاکستان کے درمیان جنگ بندی کو لے کر جھوٹا دعویٰ کیا تھا۔ اب ترکی میں اچانک پہنچنے کی ان کی حکمت عملی بھی ناکام ہوتی دکھائی دے رہی ہے۔