نیویارک میئر الیکشن: ٹرمپ کی ظہران ممدانی کو گرفتار کر کے ملک بدر کرنے کی دھمکی

امریکہ میں نیویارک سٹی کے میئر کے انتخاب کو لے کر سیاسی پارہ کافی گرم ہو گیا ہے۔ صدر ڈونالڈ ٹرمپ نے میئر عہدہ کے ڈیموکریٹک امیدوار ظہران ممدانی پر شدید حملہ کیا ہے۔ ٹرمپ نے ممدانی کو ’کمیونسٹ پاگل‘ اور خطرناک انسان قرار دیتے ہوئے انہیں گرفتار کرنے اور ملک بدر کر دینے کی دھمکی تک دے دی ہے۔

امریکی صدر ڈونالڈ ٹرمپ نے اپنے سوشل میڈیا پلیٹ فارم ’ٹروتھ‘ پر پوسٹ کر کے لکھا، ’’امریکی صدر کے طور پر میں اس کمیونسٹ پاگل کو نیویارک کو تباہ نہیں کرنے دوں گا۔ میرے پاس سارے حقوق اور متبادل ہیں۔ میں نیویارک شہر کو بچاؤں گا اور اسے پھر سے عظیم بناؤں گا، ٹھیک ویسے ہی جیسے میں نے گڈ اولڈ یو ایس اے کے ساتھ کیا تھا۔‘‘

امریکی صدر ٹرمپ کے بیان پر ظہران ممدانی نے بھی اپنا ردعمل ظاہر کیا ہے۔ انہوں نے کہا، ’’امریکہ کے صدر نے مجھے گرفتار کرنے، میری شہریت چھیننے، ڈٹینشن کیمپ میں ڈالنے اور بے دخل کرنے کی دھمکی دی ہے۔ اس لیے نہیں کہ میں نے کوئی قانون توڑا ہے بلکہ اس لیے کہ میں آئی سی ای کو ہمارے شہر میں دہشت پھیلانے نہیں دوں گا۔

ممدانی نے آگے کہا، ’’ان کا بیان نہ صرف ہماری جمہوریت پر حملہ ہے بلکہ ہر اس نیو یارکر کو پیغام دینے کی کوشش ہے جو چھایہ میں چھپنے سے انکار کرتا ہے۔ اگر آپ بولیں گے تو وہ آپ کے پیچھے پڑ جائیں گے۔‘‘

قابل ذکر ہے کہ منگل کو میئر عہدہ کے لیے ڈیموکریٹک امیدوار بنے ممدانی اگر نومبر میں منتخب ہو جاتے ہیں تو وہ نیویارک سٹی کے پہلے مسلم میئر ہوں گے۔ گزشتہ مہینے نیویارک میئر عہدہ کے لیے پرائمری انتخاب میں 33 سال کے ممدانی نے سابق میئر اینڈریو کُواومو کو کراری شکست دی۔ ممدانی اس وقت نیویارک اسٹیٹ اسمبلی میں رکن ہیں اور خود کو ایک ڈیموکریٹک سوشلسٹ بتاتے ہیں۔

ظہران ممدانی کی پیدائش 1991 میں یوگانڈا کی راجدھانی کمپالا میں ہوئی تھی۔ ان کے والد کولمبیا یونیورسٹی کے مشہور پروفیسر رہ چکے ہیں۔ ظہران کے والد کا نام محمد ممدانی تھا جبکہ ان کی والدہ ہند-امریکی فلم ڈائرکٹر میرا نائر ہیں۔ ظہران ممدانی کے والد کیپ ٹاؤن یونیورسٹی میں پروفیسر تھے۔ سال 2018 میں ظہران ممدانی کو امریکی شہریت ملی۔