’مجھے مسک کی ضرورت ہے، لوگوں کا کاروبار جتنا بہتر ہوگا، امریکہ کو اتنا ہی فائدہ ہوگا‘: ٹرمپ

امریکی صدر ڈونالڈ ٹرمپ نے ایلون مسک کی کمپنیوں سے متعلق افواہوں کی وضاحت کردی۔ ٹرمپ نے کہا کہ یہ کہنا غلط ہے کہ میں مسک کی کمپنیوں کو دی جانے والی سرکاری سبسڈی ختم کرنے جا رہا ہوں اور میں ان کی کمپنیوں کو تباہ کر دوں گا۔

ٹرمپ نے اپنے بیان میں کہا کہ ہر کوئی کہہ رہا ہے کہ میں ایلون کی کمپنیاں تباہ کردوں گا، اور ان کی بڑی سرکاری سبسڈی چھین لوں گا۔ یہ بالکل غلط ہے۔ میں چاہتا ہوں کہ ایلون اور ہمارے ملک میں کام کرنے والے تمام کاروبار پھلے پھولیں۔ اور پہلے سے زیادہ ترقی کریں۔ ٹرمپ نے کہا کہ ان لوگوں کا کاروبار جتنا بہتر ہوگا، امریکہ کو اتنا ہی فائدہ ہوگا۔ اور یہ ہم سب کے لیے اچھا ہے۔ ہم ہر روز ریکارڈ بنا رہے ہیں، اور میں چاہتا ہوں کہ یہ جاری رہے۔

آپ کو بتاتے چلیں کہ ٹرمپ کا یہ موقف نیا ہے کیونکہ اس ماہ کے شروع میں انہوں نے اشارہ دیا تھا کہ وہ ایلون مسک کی کمپنیوں کو دی جانے والی اربوں ڈالر کی سبسڈی ختم کر سکتے ہیں۔ دراصل یہ بیان ایسے وقت میں آیا ہے جب مسک نے ٹرمپ کے 'بگ بیوٹیفل بل' پر تنقید کی تھی۔ یہ وہی سبسڈی ہے جو ٹیسلا جیسی ای وی مینوفیکچرنگ کمپنیوں کو بڑا فائدہ دیتی ہے۔ ٹرمپ نے پہلے کہا تھا کہ وہ (مسک) ناراض ہیں کیونکہ ان کی ای وی سبسڈی ختم ہو رہی ہے، لیکن اگر وہ ایسا کرتے رہے تو بہت کچھ ضائع ہو سکتا ہے۔

اس ساری پیش رفت کے درمیان، 24 جولائی کی صبح ٹیسلا کے حصص میں 9فیصد کی زبردست گراوٹ دیکھنے میں آئی۔ یہ کمی کمپنی کی کمزور آمدنی اور ٹرمپ کے حال ہی میں نافذ کردہ نئے ٹیکس قانون کی وجہ سے مستقبل کے کاروبار پر پڑنے والے اثرات کے خدشات کے بعد سامنے آئی ہے۔