ہندوستان اب روس سے تیل نہیں خریدے گا، وزیر اعظم نے امریکہ کو یقین دلایا: ٹرمپ کا دعویٰ

امریکی صدر ڈونالڈ ٹرمپ نے بدھ کے روز ہندوستان کے بارے میں ایک اور بڑا دعویٰ کیا۔ انہوں نے کہا کہ ہندوستانی  وزیراعظم نریندر مودی نے انہیں یقین دلایا ہے کہ ہندوستان  اب روس سے تیل نہیں خریدے گا۔ ٹرمپ نے اسے ایک بڑا قدم قرار دیتے ہوئے کہا کہ یہ یوکرین جنگ پر روس کو تنہا کرنے کی ان کی کوششوں کا حصہ ہے۔ تاہم ہندوستان  نے ٹرمپ کے اس دعوے کے حوالے سے ابھی تک کوئی بیان جاری نہیں کیا ہے۔

وائٹ ہاؤس میں صحافیوں سے بات کرتے ہوئے، ٹرمپ نے کہا کہ انہوں نے وزیر اعظم مودی سے ہندوستان کی طرف سے روسی خام تیل کی مسلسل درآمدات پر تشویش کا اظہار کیا، جس کے بارے میں واشنگٹن کا خیال ہے کہ صدر ولادیمیر پوتن کی جنگ کو فنڈ دینے میں مدد ملتی ہے۔ٹرمپ نے کہا کہ  "لہذا میں خوش نہیں تھا کہ ہندوستان تیل خرید رہا ہے ۔‘‘

انہوں نے مزید دعویٰ کیا، "اور انہوں نے (وزیر اعظم مودی) نے آج مجھے یقین دہانی کرائی ہے کہ وہ روس سے تیل نہیں خریدیں گے۔ یہ ایک بڑا قدم ہے۔ اب ہمیں چین سے بھی ایسا کرنے کو کہنا ہے۔" امریکی صدر ٹرمپ نے یہ بھی کہا کہ توانائی پالیسی پر اختلافات کے باوجود وزیر اعظم مودی امریکہ کے  قریبی اتحادی ہیں۔ جب ان سے پوچھا گیا کہ کیا وہ چین کے ساتھ کشیدگی کے درمیان ہندوستان کو ایک قابل اعتماد پارٹنر سمجھتے ہیں، ٹرمپ نے کہا، "وہ (وزیر اعظم نریندر مودی) میرے دوست ہیں۔ ہمارے بہت اچھے تعلقات ہیں۔"

امریکی صدر نے کہا کہ ہندوستان کی تیل کی خریداری نے روس کو یوکرین پر حملے جاری رکھنے میں بالواسطہ مدد کی ہے۔ انہوں نے کہا کہ مسلسل تجارت روس کو اس جنگ کو جاری رکھنے کی اجازت دیتی ہے جس میں اس نے 150,000 افراد کو کھو دیا ہے۔ انہوں نے کہا، "یہ ایک ایسی جنگ ہے جو کبھی شروع نہیں ہونی چاہیے تھی، لیکن یہ ایک ایسی جنگ ہے جو روس کو پہلے ہفتے میں جیت لینی چاہیے تھی، اور وہ اپنے چوتھے سال میں داخل ہو رہا ہے۔ میں اسے رکتا ہوا دیکھنا چاہتا ہوں۔" ٹرمپ نے مزید کہا کہ مودی سے یقین دہانی حاصل کرنا ماسکو کی توانائی کی آمدنی میں کمی کی اوریہ  ان کی سفارتی کوششوں کا حصہ ہے۔

امریکہ کے نامزد سفیر سرجیو گور اور وزیر اعظم نریندر مودی کے درمیان ملاقات کے بارے میں پوچھے گئے سوال کے جواب میں ٹرمپ نے کہا کہ امریکہ کے نامزد سفیر سرجیو گور اور وزیر اعظم مودی کے درمیان بہت اچھی ملاقات ہوئی۔ سرجیو نے صدر ٹرمپ کو  بتایا کہ وزیر اعظم  مودی ٹرمپ کو پسند کرتے ہیں۔

جب سے مغربی ممالک نے 2022 میں روس سے توانائی کی درآمدات کو روکنا شروع کیا ہے، ہندوستان ماسکو کا سب سے بڑا خریدار بن کر ابھرا ہے۔ تجارتی اعداد و شمار کے مطابق، روسی خام تیل اب ہندوستان کی کل تیل کی درآمدات کا تقریباً ایک تہائی حصہ ہے۔