امریکہ اور یورپی یونین کے درمیان تجارتی معاہدہ طے پایا

امریکی صدر ڈونالڈ ٹرمپ اور یورپی یونین(ای یو ) کے درمیان ایک بڑے اور تاریخی تجارتی معاہدے کا اعلان کیا گیا ہے۔ ٹرمپ نے اس معاہدے کو 'اب تک کا سب سے بڑا تجارتی معاہدہ' قرار دیا ہے، جو دونوں فریقوں کے لیے فائدہ مند ثابت ہوگا۔

ٹرمپ نے اس موقع پر کہا کہ اس معاہدے کے تحت تمام ممالک کی مارکیٹیں کھول دی جائیں گی اور تمام شعبوں میں یورپی یونین پر 15 فیصد محصولات عائد کیے جائیں گے۔ اس کے ساتھ یورپی یونین امریکہ سے فوجی ساز و سامان کی خریداری میں بھی اضافہ کرے گی۔ توانائی کے شعبے میں بھی یورپی یونین امریکہ سے تقریباً 150 بلین ڈالر کی توانائی خریدے گا جس سے دونوں ممالک کا اقتصادی تعاون مزید مضبوط ہو گا۔

اس کے علاوہ یورپی یونین امریکہ میں 600 بلین ڈالر کی سرمایہ کاری کرے گی جس سے امریکی معیشت بھی مضبوط ہوگی۔ اس معاہدے کے تحت اسٹیل اور ایلومینیم پر پہلے سے نافذ ڈیوٹی سسٹم جاری رہے گا۔ چپس یا سیمی کنڈکٹر سیکٹر کے حوالے سے سیکشن 232 کے تحت آئندہ دو ہفتوں میں ایک نیا اعلان کیا جائے گا جو اس صنعت کے لیے ایک بڑا اقدام ہوگا۔

یورپی یونین کی صدر ارسولا وان ڈیر لیین نے معاہدے کو استحکام لانے کے لیے  ایک اہم پیش رفت کہا ہےاور اس سے دونوں فریقوں کے درمیان بہتر تجارتی تعلقات قائم ہوں گے۔ اس تجارتی معاہدے کو عالمی سطح پر اقتصادی تعلقات کی تشکیل نو اور تجارتی تعاون کو فروغ دینے کے لیے ایک اہم قدم سمجھا جاتا ہے۔ دونوں فریقوں کو امید ہے کہ یہ اقتصادی ترقی اور استحکام کو نئی بلندیوں تک لے جائے گا۔ اس معاہدے سے نہ صرف امریکہ اور یورپ کے تعلقات مضبوط ہوں گے بلکہ عالمی تجارت میں نئے مواقع کے دروازے بھی کھلیں گے۔