اب امریکہ میں ’ایک سینٹ‘ کا سکہ نہیں ہوگا جاری، 1793ء میں پہلی بار بازار میں ہوا تھا نمودار

امریکہ میں اب ’ایک پینی‘ یعنی ’ایک سینٹ‘ کا سکہ جاری نہیں کیا جائے گا۔ ’فلاڈیلفیا منٹ‘ نے بدھ کے روز آخری بار ایک سینٹ کا سکہ جاری کیا، اور اب اس سکہ کی ’منٹنگ‘ نہیں ہوگی۔ حالانکہ مارکیٹ میں موجود ایک سینٹ کے سکّے چلتے رہیں گے۔ تقریباً 230 سال سے بھی زیادہ عرصہ سے یہ سکّے بنائے جا رہے تھے۔

ایک سینٹ کے سکہ کو بند کرنے کی وجہ ہے، اس کو تیار کرنے میں ہونے والا خرچ اور اس کی عدم ضرورت۔ دراصل کئی کمپنیوں نے پہلے ہی ایک سینٹ کی کم موجودگی کو دیکھتے ہوئے اپنے اخراجات ایڈجسٹ کرنے شروع کر دیے ہیں۔ ایک سینٹ کا نیا سکہ نہیں جاری کرنے کے فیصلہ سے متعلق حکومت کا کہنا ہے کہ اس سے پیسے کی بچت ہوگی۔ امریکی صدر ڈونالڈ ٹرمپ نے رواں سال فروری میں ہی کہا تھا کہ ہم اپنے ملک کے بجٹ سے فضول خرچی ختم کرنا چاہتے ہیں، چاہے وہ ایک پیسے کی ہی کیوں نہ ہو۔

قابل ذکر ہے کہ ایک سینٹ کا سکہ ابراہم لنکن کی تصویر والے ہوتے ہیں اور تانبے کی تہہ چڑھے زنک سے بنائے جاتے ہیں۔ لیکن ایک سینٹ بنانے میں تقریباً 4 سینٹ کا خرچ آتا ہے، یعنی اس کی اپنی قیمت سے 4 گنا زیادہ۔ 10 سال قبل یہ خرچ نصف تھا۔ وزارتِ خزانہ کا اندازہ ہے کہ سینٹ بنانا بند کرنے سے حکومت کو ہر سال تقریباً 56 ملین ڈالر کی بچت ہوگی۔ ڈیجیٹل ادائیگیوں اور آن لائن لین دین میں اضافے کی وجہ سے پینی کی ضرورت ویسے بھی بہت کم رہ گئی ہے۔

واضح رہے کہ 1793 میں پہلی بار ایک سینٹ کا سکہ بنایا گیا تھا، لیکن اب حکومت کا کہنا ہے کہ تقریباً 300 ارب سینٹس پہلے سے ہی گردش میں ہیں، جو ضرورت سے کہیں زیادہ ہیں۔ کئی سینٹس تو استعمال ہی نہیں ہوتے۔ ایک سرکاری رپورٹ کے مطابق تقریباً 60 فیصد سکّے گھروں میں بچوں کی گلک یا درازوں میں پڑے رہتے ہیں۔ اندازہ ہے کہ ہر گھر میں تقریباً 60 سے 90 ڈالر کے سکّے یوں ہی جمع ہیں۔ تاہم عوام کے لیے حکومت کا فیصلہ ایک مشکل بھی پیدا کرے گا۔ جب کمپنیاں قیمتوں کو ’راؤنڈ آف‘ کریں گی تو عام لوگوں کو معمول سے زیادہ رقم ادا کرنی پڑ سکتی ہے۔ رچمنڈ فیڈرل ریزرو بینک کی تحقیق کے مطابق صارفین کو ہر سال تقریباً 6 ملین ڈالر کا اضافی خرچ برداشت کرنا پڑ سکتا ہے۔