ایرانی صدر پیزشکیان نے ملک کی 80 ہزار مساجد پر عوام کے لیے کام نہ کرنے کا الزام کیا عائد

ایران کی 80 ہزار مساجد صدر مسعود پیزشکیان کے نشانے پر آ گئی ہیں۔ پیزشکیان نے ان مساجد پر عوام کے لیے کام نہ کرنے کا الزام عائد کیا ہے۔ ایرانی صدر کا کہنا ہے کہ مسجد کے مولوی صرف حکومت کے لیے فرمان جاری کرتے ہیں، خود کچھ نہیں کرتے ہیں۔ مسلم اکثریتی ملک ایران میں 80 ہزار مساجد ہیں۔ یہاں کے مولویوں سے ایران کے سپریم لیڈر علی خامنہ ای بذات خود مشورہ کرتے ہیں۔

نامہ نگاروں سے بات کرتے ہوئے ایرانی صدر پیزشکیان نے کہا کہ ’’مان لیجیے حکومت سو گئی ہے، کچھ نہیں کر رہی ہے تو آپ بتائیے کہ یہاں کی مساجد میں بیٹھے مولوی کیا کر رہے ہیں؟ مساجد میں بیٹھے مولوی بھی تو اپنا کام ٹھیک سے نہیں کر پا رہے ہیں۔ مساجد کی تعمیر لوگوں کی بھلائی کے لیے کی جاتی ہے۔‘‘ انہوں نے مزید کہا کہ ’’یہاں پر 80 ہزار مساجد ہیں۔ اگر تمام مساجد ایک خاندان کو گود لیتا ہے تو ایران کی حالت بدل جائے گی۔ آپ کو زمین پر ترقی دیکھنے کو ملے گی۔‘‘

مسعود پیزشکیان کے مطابق جب سے ہماری حکومت بنی ہے تب سے حالات کافی پیچیدہ ہیں۔ میرے صدر بننے کے بعد ہی حماس کے کمانڈر یحییٰ شنوار مارے گئے۔ ایران اور اسرائیل کے درمیان جنگ شروع ہو گئی۔ ہم پر طرح طرح کی پابندیاں عائد کی گئی ہیں۔ ایسی صورتحال میں ہم زیادہ کچھ نہیں کر سکتے ہیں۔ واضح رہے کہ ایران میں 2 طرح کی سیاست ہوتی ہے، ایک بنیاد پرستی اور دوسری اصلاح پسندی کی۔ مسعود پیزیشکیان کو ایران کا اصلاح پسند لیڈر تصور کیا جاتا ہے۔ اسرائیل سے جنگ کے بعد ہی سے مسعود پیزشکیان بنیاد پرستوں کے نشانے پر ہیں۔ مسجد کے مولوی بھی بنیاد پرستی کے زمرے میں آتے ہیں۔

قابل ذکر ہے کہ کئی مواقع پر بنیاد پرستوں نے ان سے صدارتی عہدہ چھوڑنے کا مطالبہ بھی کیا ہے۔ ایسے میں اب مسعود پیزشکیان نے بنیاد پرستوں کو ہدف تنقید بنانا شروع کر دیا ہے۔ اسی سلسلے میں 80 ہزار مساجد کو مسعود پیزشکیان نے نشانہ بنایا ہے۔ کیونکہ پیزشکیان بنیاد پرستوں کے دباؤ کو کم کرنا چاہتے ہیں۔