دیگر ممالک
’غزہ پیس بورڈ‘ کو میکرون نے کیا بے نقاب، اقوام متحدہ میں امریکی صدر ٹرمپ پر کیا طنز
میکرون نے اقوام متحدہ میں کہا کہ کچھ لوگ مبینہ امن کا جشن منا رہے ہیں، لیکن غزہ میں انسانی امداد کی رسائی بحال نہیں ہوئی ہے۔ میکرون نے سوال کیا کہ کیا دنیا صرف اس صورتحال کو دیکھتی رہے گی؟
فائل تصویر آئی اے این ایس
فرانس کے صدر ایمانوئل میکرون نے غزہ میں امن و سلامتی قائم کرنے کے امریکی صدر ڈونلڈ ٹرمپ کے دعوے پر سوال اٹھائے ہیں۔ اقوام متحدہ کی جنرل اسمبلی میں خطاب کرتے ہوئے میکرون نے کہا کہ زمینی حالات ٹرمپ کے ذریعہ بتائی گئی سفارتی کامیابی کی عکاسی نہیں کرتے۔ انہوں نے خصوصاً غزہ میں انسانی امداد کی رسائی کا مسئلہ اٹھایا۔ انہوں نے کہا کہ امن و سلامتی کا دعویٰ کرنے کے باوجود انسانی امداد کی رسائی ایک لمحے کے لیے بھی دوبارہ نہیں کھلی۔ صدر میکرون نے کہا کہ اگر دنیا غزہ کی صورتحال کے حوالے سے غیر فعال رہی تو اس کی ساکھ پر سوالیہ نشان اٹھیں گے۔ انہوں نے اقوام متحدہ میں اپنی تقریر کے دوران کہا کہ کچھ لوگ مبینہ امن کا جشن منا رہے ہیں، لیکن غزہ میں انسانی امداد کی رسائی بحال نہیں ہوئی ہے۔ میکرون نے سوال کیا کہ کیا دنیا صرف اس صورتحال کو دیکھتی رہے گی؟
فرانسیسی صدر میکرون کے بیان کے بعد وائٹ ہاؤس نے ٹرمپ کے غزہ پلان کا دفاع کیا۔ وائٹ ہاؤس کی ترجمان انا کیلی نے کہا کہ ٹرمپ نے اسرائیل اور حماس کے درمیان جنگ ختم کرائی، زندہ یرغمالیوں کی رہائی یقینی بنائی اور مارے گئے یرغمالیوں کی لاشیں ان کے اہل خانہ تک پہنچائیں۔ انہوں نے کہا کہ ٹرمپ اب غزہ میں امن و سلامتی کے لیے 20 نکاتی منصوبے پر عمل درآمد کرانے کی قیادت کر رہے ہیں۔ وائٹ ہاؤس نے کہا کہ جب دوسرے لوگ صرف باتیں کر رہے تھے، تب ٹرمپ نے اس پیچیدہ مسئلے پر براہ راست کام کیا۔ میکرون نے فرانس کی جانب سے فلسطین کو تسلیم کرنے کے فیصلے کا بھی دفاع کیا۔ انہوں نے مغربی کنارے میں فلسطینیوں کے خلاف ہونے والے تشدد کا مسئلہ اٹھایا۔ میکرون نے کہا کہ وہاں ہر روز خلاف ورزیاں ہو رہی ہیں۔ انہوں نے سوال کیا کہ یہ سب کس کے نام پر ہو رہا ہے، جبکہ حماس نے ویسٹ بینک میں کبھی آپریشن نہیں کیا۔
میکرون نے کہا کہ ویسٹ بینک کے حالات فلسطینی حقوق کی بنیاد پر مستقبل میں سیاسی نظام کے قیام کے امکانات کو نقصان پہنچا رہے ہیں۔ انہوں نے پڑوسی ممالک کی خودمختاری کو کمزور کرنے کو اسرائیل کی سلامتی کے لیے بھی نقصان دہ قرار دیا۔ میکرون نے اپنے آخری یو این جی اے خطاب میں کثیر ملکی نظام کا دفاع کیا۔ انہوں نے کہا کہ دنیا کے سامنے طاقت اور دباؤ سے چلنے والے نظام یا ایک مہذب بین الاقوامی معاشرے کے درمیان انتخاب ہے۔ انہوں نے ممالک سے اقوام متحدہ کے ساتھ کھڑے رہنے کی اپیل کی اور کہا کہ دنیا ایسے نظام کو قبول نہیں کر سکتی، جس میں کسی کو بھی منمانی کرنے کی آزادی ملے۔ میکرون نے اپنی تقریر کا اختتام اقوام متحدہ کی حمایت کرتے ہوئے کیا اور کہا کہ ’لونگ لیو دی یونائیٹڈ نیشنز‘ (اقوام متحدہ زندہ باد)۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔