ایران نے شمالی صوبہ میں حملوں کی سازش کے الزام میں 4 افراد کو حراست میں لیا

ایرانی پولیس نے شمالی صوبہ قزوین میں 4 افراد کو مبینہ طور پر سرکاری اور فوجی تنصیبات پر حملوں کی سازش کے الزام میں گرفتار کیا ہے۔ یہ اطلاع نیم سرکاری فارس نیوز ایجنسی نے اتوار کو دی۔ فارس نے صوبہ کے پولیس کمانڈر محمد قاسم ترحانی کے حوالے سے بتایا کہ مشتبہ افراد پر الزام ہے کہ وہ قزوین کے ایک شہر میں سیکورٹی کو کمزور کرنے کے لیے حالیہ مظاہروں سے فائدہ اٹھانے کی کوشش کر رہے تھے۔ انہوں نے کہا کہ یہ گرفتاریاں صوبائی پولیس کے انٹیلی جنس یونٹس نے اسلامک ریوولوشن گارڈز کور کے تعاون سے کی ہیں، بغیر یہ بتائے کہ یہ گرفتاریاں کب ہوئیں۔

انہوں نے مزید کہا کہ تمام زیر حراست افراد کو اس سے قبل ایران میں 2022 کے ’فسادات‘ کے دوران گرفتار کیا گیا تھا، اور کہا کہ انہوں نے عوامی سلامتی کو کمزور کرنے کے لیے سرکاری اور فوجی تنصیبات پر حملوں کی سازش کا اعتراف کیا۔

ایرانی ریال کی قدر میں تیزی سے گراوٹ اور خراب معاشی حالات پر دسمبر کے اواخر سے کئی ایرانی شہروں میں مظاہرے پھوٹ پڑے ہیں۔ حکام نے کہا ہے کہ وہ تشدد، توڑ پھوڑ اور بدامنی کے خلاف انتباہ دیتے ہوئے معاشی شکایات کو دور کرنے کے لیے تیار ہیں۔